ശബരിമലയില്‍ നാമജപപ്രതിഷേധം നടത്തിയവരെ അറസ്റ്റ് ചെയ്തതില്‍ സംസ്ഥാനത്ത് പലയിടങ്ങളിലും വന്‍പ്രതിഷേധമാണ് ഉയരുന്നത്. ശബരിമല വലിയനടപ്പന്തലില്‍ നാമജപപ്രതിഷേധം നടത്തിയ എണ്‍പതിലധികം പേരെ പൊലിസ് അറസ്റ്റ് ചെയ്ത് നീക്കുകയായിരുന്നു.
ശബരിമലയിലെ പൊലീസ് നിയന്ത്രണങ്ങള്‍ക്കെതിരെ കുത്തിയിരുന്ന് നാമജപം നടത്തിയായിരുന്നു പ്രതിഷേധം. എന്നാല്‍ പൊലിസ് ആവശ്യപ്പെട്ടിട്ടും പിരിഞ്ഞുപോകാത്തവരെ നിരോധനാജ്ഞ നിലവിലുള്ളതിനാല്‍ അറസ്റ്റ് ചെയ്യുകയായിരുന്നു.തലസ്ഥാനത്ത് മുഖ്യമന്ത്രിയുടെ വസതിക്ക് മുന്നില്‍ ശബരിമല കര്‍മസമിതിയുടെ നേതൃത്വത്തില്‍ പ്രതിഷേധം നടന്നു. പുലര്‍ച്ചെ നാല്മണിവരെ ഇത് തുടര്‍ന്നു. ആറന്‍മുളയില്‍ ദേവസ്വം ബോര്‍ഡ് പ്രസിഡന്റ് എ. പത്മകുമാറിന്റെ വസതിയും ഉപരോധിച്ചു. മലപ്പുറം അങ്ങാടിപ്പുറത്ത് പാലക്കാട്- കോഴിക്കോട് ദേശീയപാത നാമജപപ്രതിഷേധക്കാര്‍ ഉപരോധിച്ചു. വിവിധ ജില്ലകളിലെ നിരവധി പൊലിസ് സ്റ്റേഷനുകള്‍ക്ക് മുന്നിലും പ്രതിഷേധം നടന്നു.
കൊട്ടാരക്കരിയില്‍ കെഎസ്ആര്‍ടിസി ബസിന് നേരെ കല്ലേറുണ്ടായി. തൃശൂരിലേക്ക് പോയ ബസിന്റെ മുന്‍ഭാഗത്തെ ചില്ല് മുഴുവന്‍ തകര്‍ന്നു. ആലപ്പുഴയില്‍ പോലീസ് വാഹനത്തിന്റെ ചില്ലും തകര്‍ത്തു.
ലേഖിക ..(ബിനി പ്രേംരാജ് )
