വാക്സിന് യജ്ഞത്തിനായി തെരുവുനായ്ക്കളെ എത്തിക്കണമെന്ന തദ്ദേശ സ്വയം ഭരണ വകുപ്പിന്റെ ഉത്തരവിനെതിരെ പൊലീസില്‍ പ്രതിഷേധം. പൊലീസിന്റേതല്ലാത്ത ഇത്തരം പണികള്‍ ജനമൈത്രി എന്ന പേരില്‍ പൊലീസില്‍ അടിച്ചേല്‍പ്പിക്കുന്നതു മൂലം ജോലിഭാരം കൊണ്ട് വീര്‍പ്പു മുട്ടുകയാണെന്നാണ് പൊലീസുകാരുടെ പരാതി.
ഒരു മാസം നീണ്ടു നില്‍ക്കുന്ന വാക്സിന് യജ്ഞത്തിനായി വാക്‌സിനേഷന്‍ കേന്ദ്രങ്ങളിലേക്ക് പട്ടികളെ എത്തിക്കുന്നതിനാണു ജനമൈത്രി പൊലീസിനെ കൂടി ഉപയോഗപ്പെടുത്താന്‍ നിര്‍ദേശിച്ചിരിക്കുന്നത്. സന്നദ്ധ സേനാംഗങ്ങള്‍, ജില്ലാ കുടുംബശ്രീ പ്രവര്‍ത്തകര്‍, മൃഗക്ഷേമ സംഘടനകള്‍, എന്നിവര്‍ക്കൊപ്പം പ്രവര്‍ത്തിക്കാന്‍ തയ്യാറായിട്ടുളള ജനമൈത്രി പൊലീസ് സേനാംഗങ്ങളെ നിയോഗിക്കാനാണ് നിര്‍ദേശം.
മൃഗ സംരക്ഷണ വകുപ്പ്, വനം വകുപ്പ് ജീവനക്കാര്‍, എന്നിവരടക്കമുളളവരെ ഉപയോഗപ്പെടുത്താതെ ഈ മേഖലയില്‍ വൈദഗ്ധ്യമില്ലാത്ത പൊലീസിനെ പട്ടിപിടുത്തത്തിന് നിയോഗിക്കുന്നത് അപകടമാണെന്നാണ് പൊലീസിന്റെ വശം.
സംസ്ഥാനത്തെ തെരുവു നായ്ക്കള്‍ മൂലമുണ്ടാകുന്ന പ്രശ്‌നങ്ങള്‍ പരിഹരിക്കുന്നതിനായി കഴിഞ്ഞയാഴ്ച തദ്ദേശ വകുപ്പ് മന്ത്രിയുടെ നേതൃത്വത്തില്‍ യോഗം ചേര്‍ന്നിരുന്നു. ഇതിന്റെ അടിസ്ഥാനത്തില്‍ പ്രഖ്യാപിച്ച് കര്‍മ്മ പദ്ധതികളിലാണ് ജനമൈത്രി പൊലീസിന്റെ സേവനം ഉപയോഗപ്പെടുത്താന്‍ നിര്‍ദേശമുളളത്. പട്ടിയെ പിടിക്കുന്നതിനായി 300 രൂപയും കൊണ്ടു വരുന്നതിനുളള ചെലവായി 200രൂപയും നല്‍കുമെന്നും ഉത്തരവിലുണ്ട്.
