വിമാനത്തില്‍ യുവ നടിയെ അപമാനിച്ച കേസില്‍ പ്രതിക്ക് തിരിച്ചടി. അറസ്റ്റ് തടയണമെന്ന പ്രതി സിആര്‍ ആന്റോയുടെ ആവശ്യം കോടതി തള്ളി. എറണാകുളം ജില്ലാ സെഷന്‍സ് കോടതിയുടേതാണ് നടപടി. മുന്‍കൂര്‍ ജാമ്യ ഹര്‍ജിയില്‍ കോടതി ചൊവ്വാഴ്ച വാദം കേള്‍ക്കും. കേസില്‍ പൊലീസിനോട് റിപ്പോര്‍ട്ട് നല്‍കാന്‍ കോടതി നിര്‍ദ്ദേശം നല്‍കി.
കഴിഞ്ഞ ദിവസം മുംബൈയില്‍ നിന്ന് കൊച്ചിയിലേക്കുള്ള യാത്രക്കിടെ എയര്‍ ഇന്ത്യ വിമാനത്തിലായിരുന്നു കേസിനാസ്പദമായ സംഭവം നടന്നത്. കേസില്‍ പ്രതിയ്‌ക്കെതിരെ ചുമത്തിയിട്ടുള്ളത് ജാമ്യമില്ലാ വകുപ്പുകളാണെന്ന പൊലീസ് വാദം കോടതി അംഗീകരിക്കുകയായിരുന്നു. പ്രതിയായ തൃശൂര്‍ സ്വദേശി ആന്റോ ഇപ്പോഴും ഒളിവിലാണ്. വിമാനത്തില്‍ സീറ്റിനെച്ചൊല്ലിയുള്ള തര്‍ക്കം മാത്രമാണ് ഉണ്ടായതെന്നും അപമര്യാദയായി പെരുമാറിയിട്ടില്ലെന്നുമാണ് ഇയാളുടെ വാദം.
എന്നാല്‍ പരാതിയില്‍ ഉറച്ച് നില്‍ക്കുകയാണ് നടി. എയര്‍ ഇന്ത്യയുടെ ഭാഗത്തുനിന്നും ഇതുവരെ പ്രതികരണം ഉണ്ടായിട്ടില്ലെന്നും നടി വിമര്‍ശിച്ചു. സോഷ്യല്‍ മീഡിയയിലൂടെ നടി തന്നെ വിശദീകരണ വീഡിയോ പങ്കുവെച്ചിട്ടുണ്ട്. അപരിചിതരായ ആളുകളുടെ അടുത്ത് ഇടപഴകുന്ന കാര്യത്തിൽ പരിധിയുണ്ട്. അത് ലംഘിക്കപ്പെട്ടു. ആ പരിധി എവിടം വരെയാണന്നുള്ള കാര്യത്തിൽ എല്ലാവരും ബോധവാന്മാരാകണമെന്നാണ് നടി വീഡിയോയിൽ പറയുന്നത്.
നടിയുടെ വാക്കുകൾ: വിൻഡോ സൈഡിലുള്ള 12A ആയിരുന്നു സീറ്റ്. അവിടെ ഇരിക്കാൻ പറ്റാത്ത വിധത്തിൽ പരാതിയിൽ പറഞ്ഞിട്ടുള്ള വ്യക്തി നിൽക്കുകയായിരുന്നു. 12Bയിലാണു അയാൾ ഇരുന്നത്. മര്യാദയ്ക്കായിരുന്നില്ല അയാൾ ഇരുന്നത്. അതുകൊണ്ട് എനിക്കും ഇരിക്കുന്നതിൽ ബുദ്ധിമുട്ടുണ്ടായി. അയാൾ മദ്യപിച്ചിട്ടുണ്ടായിരുന്നു. പേരും ജോലിയും ചോദിച്ചു. ഗൂഗിളിൽ നിന്നുള്ള എന്റെ ഫോട്ടോ കാണിച്ചിട്ട് അതിലുള്ള പോലെയല്ലല്ലോ ഇരിക്കുന്നതെന്നു പറഞ്ഞു. നടിയാണെന്നു പറഞ്ഞപ്പോൾ അപ്പുറത്ത് ഇരിക്കുന്ന സുഹ‍ൃത്തിന്റെ അടുത്ത് അപമാനിച്ചു സംസാരിച്ചു. ‘വല്ല്യ നടിയാണല്ലോ, ഞാൻ വേണമെങ്കിൽ അപ്പുറത്തിരിക്കാം, നീ വേണമെങ്കിൽ ഇവിടെ ഇരുന്നോ, നടിയുടെ അടുത്ത് ഞാനിരിക്കണോ’ എന്ന രീതിയിലായിരുന്നു സംസാരം.
വളരെയധിക അപമാനിക്കപ്പെട്ടു. എന്റെ വശത്തേക്കു ചാഞ്ഞിട്ടായിരുന്നു സുഹൃത്തിനോടു സംസാരിച്ചിരുന്നത്. അയാളുടെ കൈ തട്ടിയപ്പോൾ ആദ്യം മിണ്ടിയില്ല. രണ്ടാമതും തട്ടിയപ്പോൾ ദയവ് ചെയ്തു മര്യാദയ്ക്ക് ഇരിക്കണമെന്നും നിങ്ങൾ തട്ടുന്നുണ്ടെന്നും പറഞ്ഞു. നിന്നെ ഞാനെപ്പോഴാണു തൊട്ടതു എന്നുചോദിച്ച് അയാൾ ശബ്ദം ഉയർത്തി. വളരെ മോശമായി പെരുമാറി. സ്വന്തം സീറ്റിൽ സമാധാനത്തിൽ ഇരിക്കാൻ പറ്റിയില്ല. തുടർന്ന് എയർഇന്ത്യയുടെ സ്റ്റാഫിനോട് വിവരം പറയുകയും നടപടി എടുക്കണമെന്ന് ആവശ്യപ്പെടുകയും ചെയ്തു. എയർഹോസ്റ്റസ് വന്നിട്ട് മറ്റൊരു സീറ്റ് തരുകയാണ് ചെയ്തത്. എനിക്കവിടെ നിന്നു മാറേണ്ടി വന്നു. വിഷയം പറഞ്ഞപ്പോൾ എന്നെ വേറൊരു സീറ്റിലേക്കു മാറ്റുകയാണ് ചെയ്തത്. അതു മാനസികമായി വലിയ ബുദ്ധിമുട്ടുണ്ടാക്കി. അയാൾക്കെതിരെ ഒരു നടപടിയും എടുത്തില്ല.
എയർപോർട്ടിലിറങ്ങിയതിനു ശേഷം അയാളുടെ സുഹൃത്തുക്കളെത്തി സംഭവത്തിൽ ക്ഷമചോദിച്ചു. അയാളുടെ സീറ്റ് 12C ആണെന്നും അവർ പറഞ്ഞു. എയർ ഇന്ത്യയുടെ ഉദ്യോഗസ്ഥനോട് എയർപോർട്ടിൽ വച്ച് കാര്യങ്ങൾ പറഞ്ഞു. എന്ത് നടപടിയാണു എടുക്കാൻ പറ്റുക എന്ന് ചോദിച്ചു. അയാളുടെ നിർദേശപ്രകാരം പൊലീസ് എയ്‍ഡ് പോസ്റ്റിൽ പോയി സംസാരിച്ചു. നെടുമ്പാശ്ശേരി പൊലീസ് സ്റ്റേഷനിലേക്കു മെയിലിൽ പരാതി അയച്ചു. നെടുമ്പാശ്ശേരി പൊലീസ് സ്റ്റേഷനിൽ നിന്ന് പ്രതികരണമുണ്ടായി. എയർ ഇന്ത്യയുടെ ഭാഗത്തുനിന്നും ഇതുവരെ ഒരു പ്രതികരണവും ഉണ്ടായിട്ടില്ല.’- നടി പ്രതികരിച്ചു.
