നവജാത ശിശുവിനെ കുഴിച്ചിട്ട സംഭവത്തില്‍ കുഞ്ഞിന്റെ മൃതദേഹം കണ്ടെത്തിയെന്ന് സ്ഥിരീകരിച്ച് ആലപ്പുഴ ജില്ലാ പോലീസ് മേധാവി. കൊല്ലനോടി പാടശേഖരത്തിലെ മണ്ണിലാണ് മൃതദേഹം കണ്ടെത്തിയത്. അറസ്റ്റിലായ യുവതിയുടെ കാമുകൻ തോമസ് പറഞ്ഞ സ്ഥലത്ത് നിന്നാണ് മൃതദേഹം കണ്ടെത്തിയത്.
പ്രസവം നടന്നത് ആറാം തീയതി പുലര്‍ച്ചെയാണ്. മൃതദേഹം മറവ് ചെയ്തത് ഏഴാം തീയതിയാണെന്നും ജില്ലാ പൊലീസ് മേധാവി പറഞ്ഞു. പ്രതികൾക്കൊപ്പം പോലീസും ശ്മശാനസ്ഥലത്ത് തെളിവുകൾ ശേഖരിച്ചു. നവജാത ശിശുവിൻ്റെ ദുരൂഹമരണം പുറംലോകത്തെത്തുമ്പോൾ ഡോക്ടർമാരുടെ സംശയം നിഴലിക്കുന്നു. വയറുവേദനയെ തുടർന്ന് യുവതി എറണാകുളത്തെ സ്വകാര്യ ആശുപത്രിയിൽ എത്തിയിരുന്നു. സംശയം തോന്നിയ ആശുപത്രി മാനേജ്‌മെൻ്റ് മാതാപിതാക്കളുടെ സാന്നിധ്യത്തിൽ മാത്രമേ ചികിത്സിക്കാൻ കഴിയൂ എന്ന് പറഞ്ഞു. പിന്നീട് മാതാപിതാക്കൾ ആശുപത്രിയിൽ എത്തിയപ്പോഴാണ് യുവതിയുടെ പ്രസവവിവരം അറിയുന്നത്.
