നിർത്തിയിട്ടിരുന്ന കെഎസ്ആർടിസി ബസ് പിന്നിലേക്ക് നീങ്ങി അപകടമുണ്ടായി. കോട്ടയം കെഎസ്ആർടിസി സ്റ്റാൻഡിൽ നിർത്തിയിട്ടിരുന്ന ബസ് നീങ്ങി മതിലിൽ ഇടിക്കുകയായിരുന്നു. ബസ് സ്റ്റാന്‍ഡിന് മുന്നിലുള്ള റോഡ് മുറിച്ചുകടന്ന ബസ് എതിർവശത്തുള്ള പ്രസ് ക്ലബ്-പിഡബ്ല്യുഡി കെട്ടിടത്തിൻ്റെ ഗേറ്റും മതിലും തകർത്തു.
റോഡിൽ മറ്റ് വാഹനങ്ങളോ യാത്രക്കാരോ ഇല്ലാതിരുന്നതിനാൽ വൻ ദുരന്തം ഒഴിവായി. ഇന്ന് പുലർച്ചെ മൂന്നരയോടെയാണ് സംഭവം. വാഹനം നിർത്തി കാപ്പി കുടിക്കാൻ പോയ സമയത്താണ് അപകടമുണ്ടായതെന്ന് അധികൃതർ പറഞ്ഞു. ബസ് ബ്രേക്ക് നഷ്ടപ്പെട്ട് നീങ്ങി റോഡിൻ്റെ എതിർവശത്തെ മതിലിലും ഗേറ്റിലും ഇടിക്കുകയായിരുന്നു. രാവിലെ റോഡിൽ വാഹനങ്ങളും കാൽനടയാത്രക്കാരും കുറവായിരുന്നു. ഇതോടെ വൻ അപകടം ഒഴിവായി.
