തിരുവനന്തപുരം: രണ്ട് ഓട്ടോറിക്ഷകളിലായി കടത്താൻ ശ്രമിച്ച 15 കിലോയോളം കഞ്ചാവുമായി നാലുപേര്‍ പിടിയിലായി. പവര്‍ഹൗസ് റോഡില്‍ വച്ച്‌ ഇവരെ സ്റ്റേറ്റ് എക്സൈസ് എൻഫോഴ്സ്മെന്‍റ് സ്ക്വാഡ് പിടികൂടുകയായിരുന്നു.
അന്യസംസ്ഥാനത്തു നിന്ന് ട്രെയിൻ മാര്‍ഗം തിരുവനന്തപുരത്ത് എത്തിച്ച കഞ്ചാവാണ് ഓട്ടോയില്‍ കടത്തവെ പിടികൂടിയത്.
അതിയന്നൂര്‍ പച്ചിക്കോട് സ്വദേശി സജീര്‍, വള്ളക്കടവ് സ്വദേശി ഫൈസല്‍, ബീമാപ്പള്ളി സ്വദേശികളായ ഷെരീഫ്, അൻസാരി എന്നിവരാണ് അറസ്റ്റിലായത്. ഇവര്‍ വന്ന ഓട്ടോറിക്ഷകളും കസ്റ്റഡിയിലെടുത്തു.
സ്റ്റേറ്റ് എക്സൈസ് എൻഫോഴ്സ്മെന്‍റ് സ്ക്വാഡ് തലവൻ അസിസ്റ്റന്‍റ് എക്സൈസ് കമ്മീഷണര്‍ റ്റി. അനികുമാറിന്‍റെ നേതൃത്വത്തില്‍ സ്‌ക്വാഡിലെ ഉദ്യോഗസ്ഥരും, ഐബി യൂണിറ്റും, തിരുവനന്തപുരം റേഞ്ച് പാര്‍ട്ടിയും ചേര്‍ന്നാണ് പ്രതികളെ തന്ത്രപരമായി പിടികൂടിയത്.
