പാലക്കാട്: യുവ കഥാകൃത്ത് എസ് ജയേഷ് (39) അന്തരിച്ചു. തലചുറ്റി വീണതിനെ തുടര്‍ന്ന് തലയ്ക്ക് ഗുരുതരമായി പരിക്കേറ്റിരുന്നു. തുടര്‍ന്ന് കോയമ്പത്തൂര്‍ സ്വകാര്യ ആശുപത്രിയില്‍ ചികിത്സയിലിരിക്കെ രാവിലെയായിരുന്നു അന്ത്യം. പാലക്കാട് വീട്ടില്‍ വെച്ചാണ് സംസ്‌കാരം.
പനിയെത്തുടര്‍ന്ന് ജയേഷിനെ ആശുപത്രിയില്‍ പ്രവേശിപ്പിച്ചപ്പോഴാണ് തല ചുറ്റി വീണത്. കഴിഞ്ഞ 13-ാം തിയതിയായിരുന്നു അപകടമുണ്ടായത്. ഗുരുതരാവസ്ഥയിലുള്ള ജയേഷിനായി മികച്ച ചികിത്സാ ഉറപ്പാക്കാന്‍ സുഹൃത്തുക്കള്‍ പണം സമാഹരിച്ചു വരുന്നതിനിടെയായിരുന്നു മരണം.
മായക്കടല്‍, ഒരിടത്തൊരു ലൈന്‍മാന്‍, ക്ല, പരാജിതരുടെ രാത്രി എന്നിവയാണ് ജയേഷിന്റെ പ്രസിദ്ധീകരണങ്ങള്‍. ചാരുനിവേദിത, പെരുമാള്‍ മുരുകന്‍ എന്നീ തമിഴ് എഴുത്തുകാരുടെ കൃതികള്‍ മലയാളത്തിലേക്ക് വിവര്‍ത്തനം ചെയ്തത് ജയേഷാണ്.
