ആലപ്പുഴ: കിണറ്റില്‍ മുങ്ങിത്താഴ്ന്ന രണ്ടു വയസ്സുകാരന്‍ കുഞ്ഞനുജനെ രക്ഷപ്പെടുത്തി എട്ടു വയസ്സുകാരി. മാവേലിക്കരയിലാണ് സംഭവം. പൈപ്പിലൂടെ ഇറങ്ങിയാണ് എട്ടു വയസ്സുകാരി തന്റെ അനിയനെ രക്ഷപ്പെടുത്തിയത്. മാങ്കാംകുഴി കല്ലിത്തുണ്ടം പറങ്കാംകൂട്ടത്തില്‍ താമസിക്കുന്ന ദിയ ഫാത്തിമയാണ് അനുജനെ രക്ഷിച്ചത്.
ഇന്നലെ വൈകീട്ട് അഞ്ച് മണിയോടെയായിരുന്നു സംഭവം. കുട്ടികളുടെ അമ്മ ഷാജില മുറ്റത്തു പാത്രം കഴുകുകയായിരുന്നു. ദിയയും അനുജത്തി ദുനിയയും അയയില്‍ നിന്നു വസ്ത്രങ്ങള്‍ എടുക്കുകയായിരുന്നു. ഇതിനിടെയാണ് ഇവരുടെ കണ്ണ് വെട്ടിച്ച് ഇവാന്‍ കിണറിനടുത്തുള്ള പമ്പില്‍ ചവിട്ടി കിണറിനു മുകളിലേക്ക് കയറിയത്. തുടര്‍ന്ന് തുരുമ്പിച്ച ഇരുമ്പുമറയുടെ മധ്യഭാഗം തകര്‍ന്ന് കുട്ടി കിണറ്റിലേക്ക് വീഴുകയായിരുന്നു. 20 അടിയിലേറെ താഴ്ചയുണ്ട് കിണറിന്. ശബ്ദം കേട്ട ഉടന്‍ തന്നെ സഹോദരി ദിയ ഓടിയെത്തി. കിണറ്റിനടിയില്‍ കൈകാലിട്ടടിക്കുന്ന കുഞ്ഞനുജനെയാണ് ദിയ കണ്ടത്.
കിണറ്റിലേക്കുള്ള പിവിസി പൈപ്പിലൂടെ ഇറങ്ങി ഇവാനെ ദിയ രക്ഷപ്പെടുത്തുകയായിരുന്നു. തുടര്‍ന്ന് ഷാജിലയുടെ നിലവിളി കേട്ട് ഓടിയെത്തിയ നാട്ടുകാര്‍ രണ്ടു കുട്ടികളെയും കിണറ്റില്‍ നിന്നും പുറത്തേക്കെത്തിച്ചു. ഇവാന്റെ തലയില്‍ ചെറിയ മുറിവേറ്റിട്ടുണ്ട്. തുടര്‍ന്ന് ഇവാനെ ആലപ്പുഴ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. നിലവില്‍ കുഞ്ഞ് ശിശു തീവ്രപരിചരണ വിഭാഗത്തില്‍ നിരീക്ഷണത്തിലാണ്. ദിയയ്ക്ക് പരുക്കേറ്റിട്ടില്ല. വെട്ടിയാര്‍ ഇരട്ടപ്പള്ളിക്കൂടം ഗവ. സ്‌കൂളില്‍ മൂന്നാം ക്ലാസ് വിദ്യാര്‍ഥിയാണ് ദിയ. കൃത്യ സമയത്തെ ദിയയുടെ ഇടപ്പെടല്‍ മൂലം അനുജന്‍ രക്ഷപ്പെടുകയായിരുന്നു.
