മൂവാറ്റുപുഴ: മനുഷ്യനെ പടി പടിയായി മനുഷ്യത്വത്തിന്റെ ഉന്നതിയിലേക്ക് ഉയര്‍ത്തുകയെന്നതാണ് വിദ്യാഭ്യാസത്തിന്റെ ലക്ഷ്യമെന്ന് പ്രൊഫ. എം.കെ. സാനുമാസ്റ്റര്‍ പറഞ്ഞു. നല്ല വിദ്യാഭ്യാസമാണ് നല്ല മനുഷ്യനെ സൃഷ്ടിക്കുന്നത്. മനുഷ്യനെ മൃഗീയതയില്‍ നിന്നും മുക്തമാക്കി സേവന സന്നദ്ധമായ നല്ല മനസിനുടമയായി മാറ്റുകയെന്നതാണ് അറിവ് സമ്പാദനത്തിലൂടെ മനുഷ്യന് കൈവരുന്നത്. രാജ്യ സേവനത്തിനുവേണ്ടി കിരീടം അണിയേണ്ട ശിരസ് മുണ്ഡനം ചെയ്ത് കൈയ്യില്‍ ലഭിച്ച ചെങ്കോല്‍ വലിച്ചെറിഞ്ഞ് മനുഷ്യരാശീയുടെ കണ്ണീരൊപ്പാന്‍ ഇറങ്ങിപുറപ്പെട്ട ശ്രീബുദ്ധന്റെ മാതൃകയാണ് പ്രതിഭ പുരസ്‌ക്കാരം ഏറ്റുവാങ്ങുന്ന അദ്ധ്യാപകരും വിദ്യാര്‍ത്ഥികളും സ്വീകരിക്കേണ്ടതെന്നും സാനുമാസ്റ്റര്‍ പറഞ്ഞു. മൂവാറ്റുപുഴ എസ്.എന്‍.ഡി.പി ഹയര്‍സെക്കന്ററി സ്‌ക്കൂളില്‍നിന്നും 2022-ല്‍ എസ്.എസ്.എല്‍.സി, പ്ലസ് ടു പരീക്ഷകളില്‍ ഉന്നത വിജയം നേടിയ വിദ്യാര്‍ത്ഥികളെ അജു ഫൗണ്ടേഷന്റെ ആഭിമുഖ്യത്തില്‍ പ്രതിഭ പുരസ്‌കാരം നല്‍കി ആദരിക്കുന്ന ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു സാനുമാസ്റ്റര്‍ . മൂവാറ്റുപുഴ ശ്രീനാരായണ കോളേജ് ഓഡിറ്റോറിയത്തില്‍ നടന്നപുരസ്‌ക്കാര ദാന ചടങ്ങില്‍ കോളേജ് മാനേജര്‍ വി.കെ. നാരായണന്‍ അദ്ധ്യക്ഷത വഹിച്ചു .
മുന്‍ എം.പി. അഡ്വ. ജോയ്‌സ് ജോജ്ജ് പ്രതിഭ പുരസ്‌ക്കാരങ്ങള്‍ സമ്മാനിച്ചു. എസ്.ഇ.ആര്‍.ടി മുന്‍ ഡയറക്ടര്‍ ഡോ. ജെ. പ്രസാദ് ഉന്നത വിജയത്തിന് നേതൃത്വം നല്‍കിയ അദ്ധ്യാപകരെ ആദരിച്ചു . അജുഫൗണ്ടേഷന്‍ ഡയറക്ടറും അന്നൂര്‍ ദന്തല്‍ കോളേജ് ചെയര്‍മാനുമായ റ്റി.എസ്. റഷീദ് , എസ്.എന്‍.ഡി.പി. ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ടി.രാധാകൃഷ്ണന്‍, ഹെഡ്മിസ്ട്രസ് വി.എസ്.ധന്യ എന്നിവര്‍ സംസാരിച്ചു . അജു ഫൗണ്ടേഷന്‍ ജനറല്‍ സെക്രട്ടറി പ്രമോദ് കെ.തമ്പാന്‍ സ്വാഗതവും കുമാരനാശാന്‍ പബ്ലിക് ലൈബ്രറി സെക്രട്ടറി രജീഷ് ഗോപിനാഥ് നന്ദിയും പറഞ്ഞു . മൂവാറ്റുപുഴ യൂണിയന്‍ വൈസ് പ്രസിഡന്റ് പി.എന്‍. പ്രഭ, ഫൗണ്ടേഷന്‍ ഡയറക്ടര്‍മാരായ കെ.എം. ദിലീപ്, അജേഷ് കോട്ടമുറിക്കല്‍, രഞ്ചന്‍, സി.കെ. ഉണ്ണി , കുമാരനാശാന്‍ പബ്ലിക് ലൈബ്രറി ജോയിന്റ് സെക്രട്ടറി കെ.വി. മനോജ, ദിവ്യ സുധിമോന്‍ എന്നിവര്‍ നേതൃത്വം നല്‍കി.
