എല്ലാ വിഷയത്തിനും എ പ്ലസ് നേടിയവര്‍ക്ക് സീറ്റ് ലഭിച്ചില്ലെന്ന് പ്രതിപക്ഷ നേതാവ് വിഡി സതീശന്‍ നിയമസഭയില്‍. പതിനായിരക്കണക്കിന് കുട്ടികള്‍ക്ക് സീറ്റില്ല. ഇനി 683 മെരിറ്റ് സീറ്റാണ് ബാക്കി ഉള്ളത്. വിദ്യാഭ്യാസ മന്ത്രി ഒരേ മറുപടി തന്നെയാണ് ആവര്‍ത്തിക്കുന്നതെന്നും പ്രതിപക്ഷ നേതാവ് ആരോപിച്ചു.
ഉപരിപഠനത്തിന് അര്‍ഹത നേടിയ എല്ലാ വിദ്യാര്‍ഥികള്‍ക്കും പ്ലസ് വണ്‍ സീറ്റുകള്‍ ഉറപ്പാക്കുമെന്ന് വിദ്യാഭ്യാസ മന്ത്രി വി. ശിവന്‍കുട്ടി പറഞ്ഞു. ഒക്ടോബര്‍ 23ന് താലൂക്ക് അടിസ്ഥാനത്തില്‍ വിദ്യാര്‍ഥികളുടെ കണക്കെടുക്കുമെന്നും മന്ത്രി നിയമസഭയില്‍ അറിയിച്ചു.
എല്ലാത്തിനും എ പ്ലസ് ലഭിച്ചവര്‍ക്ക് സീറ്റ് ലഭിച്ചിട്ടില്ലെന്നും, പതിനായിരക്കണക്കിന് കുട്ടികള്‍ക്ക് സീറ്റ് കിട്ടാതെ പുറത്താണെന്നും സബ്മിഷന്‍ അവതരിപ്പിച്ച വി.ഡി സതീശന്‍ പറഞ്ഞു. എന്നാല്‍, വിഷയം ഗൗരവത്തോടെ കാണുന്നുവെന്ന് വിദ്യാദ്യാസ മന്ത്രി വി. ശിവന്‍കുട്ടി വ്യക്തമാക്കി. വിദ്യാര്‍ത്ഥികളുടെ ഉപരിപഠനം ഉറപ്പാക്കാനല്ല, രാഷ്ട്രീയ ദുഷ്ടലാക്കാണ് പ്രതിപക്ഷത്തിനെന്നും മന്ത്രി ആരോപിച്ചു.
വിദ്യാര്‍ത്ഥികള്‍ക്ക് ഉത്കണ്ഠ വേണ്ട, എല്ലാവര്‍ക്കും ഉപരിപഠനത്തിന് അവസരമൊരുക്കും. സംസ്ഥാന അടിസ്ഥാനത്തില്‍ ഒരു ലക്ഷത്തിലധികം സീറ്റുകള്‍ ഉണ്ട്. ഒക്ടോബര്‍ 23 ന് ഇതു സംബന്ധിച്ച കണക്കെടുപ്പ് താലൂക്ക് അടിസ്ഥാനത്തില്‍ നടത്തുമെന്നും മന്ത്രി പറഞ്ഞു. എന്നാല്‍, മന്ത്രിയുടെ മറുപടി തൃപ്തികരമല്ലെന്ന് പ്രതിപക്ഷം പറഞ്ഞതോടെ സഭയില്‍ ഭരണ- പ്രതിപക്ഷ ബഹളമായി. വിദ്യാര്‍ഥികളുടെ കാര്യത്തില്‍ സര്‍ക്കാര്‍ ഇടപെടുന്നില്ലെന്നാരോപിച്ച് പ്രതിപക്ഷം സഭയില്‍ നിന്നിറങ്ങിപ്പോവുകയും ചെയ്തു.
