മൂവാറ്റുപുഴ :മൂല്യനിര്‍ണ്ണയ ക്യാമ്പുകളില്‍ കറുപ്പണിഞ്ഞ് ഹയര്‍ സെക്കന്‍ഡറി അധ്യാപകര്‍ പ്രതിഷേധിച്ചു. ഖാദര്‍ കമ്മിറ്റിയുടെ രണ്ടാം ഘട്ടറിപ്പോര്‍ട്ട് സര്‍ക്കാരിന് സമര്‍പ്പിക്കുകയും പൊതു വിദ്യാഭ്യാസത്തിന്റെ ഗുണനിലവാരത്തകര്‍ച്ചക്ക് കാരണമാകുന്ന തരത്തില്‍ ഹൈസ്‌കൂള്‍ ഹയര്‍ സെക്കണ്ടറി ഏകീകരണ നടപടികള്‍ തുടങ്ങാന്‍ സര്‍ക്കാര്‍ നീക്കങ്ങളാരംഭിച്ച സാഹചര്യത്തില്‍ ഹയര്‍ സെക്കണ്ടറി മൂല്യനിര്‍ണ്ണയം നടക്കുന്ന മൂവാറ്റുപുഴ സെന്റ് അഗസ്റ്റിന്‍ ഹയര്‍ സെക്കണ്ടറി സ്‌കൂളില്‍ കരിദിനമാചരിച്ചു. ക്യാമ്പില്‍ പങ്കെടുക്കുന്ന അധ്യാപകര്‍ കറുത്ത വസ്ത്രം ധരിച്ച് ക്യാമ്പിലെത്തി. തുടര്‍ന്ന് സ്‌കൂളിന് മുമ്പില്‍ പ്രതിഷേധ യോഗം നടത്തി.
പ്രതിഷേധ യോഗം ഫെഡറേഷ ഓഫ് ഹയര്‍ സെക്കണ്ടറി ടീച്ചേഴ്‌സ് അസോസിയേഷന്‍ ജില്ലാ ചെയര്‍മാന്‍ ഡോ.എസ് സന്തോഷ് ഉദ്ഘാടനം ചെയ്തു. ഷിബു സി.ജോര്‍ജ് ,സിനോജ് ജോര്‍ജ് , ഡോ.ഷാജി പോള്‍ , ഡോ.പോള്‍ ജോ ജോര്‍ജ് , സിന്നി ജോര്‍ജ് , പ്രീത. കെ നായര്‍ എന്നിവര്‍ പ്രതിഷേധ പരിപാടികള്‍ക്ക് നേതൃത്വം നല്‍കി.
