ആലപ്പുഴ: സോളാര്‍ അഴിമതിക്കേസിലെ അന്വേഷണ ഉദ്യോഗസ്ഥനായിരുന്ന റിട്ടയേര്‍ഡ് ഡിവൈഎസ്പി കെ ഹരികൃഷ്ണനെ ട്രെയിന്‍ തട്ടി മരിച്ച നിലയില്‍ കണ്ടെത്തി. വെള്ളിയാഴ്ച രാത്രി 12.30ഓടെ മൃതദേഹം കണ്ടെത്തിയിരുന്നെങ്കിലും ഇന്ന് പുലര്‍ച്ചെയോടെയാണ് മൃതദേഹം തിരിച്ചറിഞ്ഞത്. കായംകുളം രാമപുരത്തെ റെയില്‍വേ ക്രോസിലാണ് ഹരികൃഷ്ണനെ മരിച്ച നിലയില്‍ കണ്ടെത്തിയത്.
അപകടസ്ഥലത്തിന് സമീപത്ത് നിര്‍ത്തിയിട്ടിരുന്ന ഇദ്ദേഹത്തിന്റെ കാറില്‍ നിന്ന് ആത്മഹത്യാക്കുറിപ്പും കണ്ടെത്തിയിട്ടുണ്ട്. ഹരികൃഷ്ണന്‍ അടുത്തിടെ വലിയ മാനസിക സംഘര്‍ഷത്തിലായിരുന്നുവെന്ന് ബന്ധുക്കള്‍ വെളിപ്പെടുത്തിയിട്ടുണ്ട്.
ഹരിപ്പാട് സ്വദേശിയായിരുന്ന ഹരികൃഷ്ണന്‍ പെരുമ്പാവൂര്‍ ഡിവൈഎസ്പിയായിരുന്ന സമയത്താണ് സോളാര്‍ കേസ് അന്വേഷിച്ചത്. അന്വേഷണവുമായി ബന്ധപ്പെട്ട് നിരവധി ആരോപണങ്ങള്‍ ഇദ്ദേഹത്തിനെതിരെ ഉയര്‍ന്നിരുന്നു. സോളാര്‍ കേസിലെ പ്രതി സരിത എസ് നായരുടെ അറസ്റ്റ് മുതല്‍ ഹരികൃഷ്ണനെതിരെ വിവാദങ്ങള്‍ ഉണ്ടായിരുന്നു. അര്‍ധരാത്രി തിടുക്കപ്പെട്ട് സരിതയെ അറസ്റ്റ് ചെയ്തത് കേസിലെ ഉന്നതരെ സംരക്ഷിക്കുന്നതിനാണ് എന്നായിരുന്നു ആരോപണം. കേസുമായി ബന്ധപ്പെട്ട് അനധികൃതമായി സ്വത്ത് സമ്പാദിച്ചെന്ന പരാതിയില്‍ വിജിലന്‍സ് കേസുകളും ഹരികൃഷ്ണനെതിരെ ഉണ്ട്.
