മൂവാറ്റുപുഴയുടെ രാഷ്ട്രീയ സാമൂഹ്യ സാംസ്‌ക്കാരിക രംഗത്ത് ഒരുകാലത്തെ നിറസാന്നിദ്ധ്യമായിരുന്ന കടാതി പള്ളിപ്പാട്ട് വീട്ടില്‍ അഡ്വ. പി. ജി. സുരേഷ്‌കുമാര്‍ അന്തരിച്ചു. 69 വയസ്സായിരുന്നു. കാക്കനാട് സണ്‍റൈസ് ഹോസ്പിറ്റലില്‍ ഇന്ന് രാവിലെയായിരുന്നു അന്ത്യം. കഴിഞ്ഞ കുറച്ചു വര്‍ഷങ്ങളായി എറണാകുളത്തായിരുന്നു താമസം.
മൂവാറ്റുപുഴ നഗരസഭ കൗണ്‍സിലര്‍, മൂവാറ്റുപുഴ അര്‍ബന്‍ സഹകരണ ബാങ്ക് ചെയര്‍മാന്‍, മേള ഫൈന്‍ ആര്‍ട്ട്‌സ് സൊസൈറ്റി പ്രസിഡന്റ്, മ്യൂസിക് ക്ലബ് പ്രസിഡന്റ്, അഗ്രി ഹോര്‍ട്ടി കള്‍ച്ചറല്‍ സൊസൈറ്റി സെക്രട്ടറി തുടങ്ങി നിരവധി പ്രസ്ഥാനങ്ങളുടെ ഭാരവാഹിത്വം വഹിച്ചിട്ടുണ്ട്.
മികച്ച പ്രാസംഗികനും സംഘാടകനുമായിരുന്ന ഇദ്ദേഹം സി. പി. ഐ. (എം) ഏരിയ കമ്മിറ്റിയംഗം, സി. ഐ. ടി. യു. ഏരിയ സെക്രട്ടറി, സി. പി. ഐ. (എം) മുനിസിപ്പല്‍ നോര്‍ത്ത് ലോക്കല്‍ സെക്രട്ടറി എന്നീ ഉത്തരവാദിത്വങ്ങള്‍ വഹിച്ചിട്ടുണ്ട്. കൂടാതെ ചെത്ത് തൊഴിലാളി യൂണിയന്‍, മോട്ടോര്‍ ഡ്രൈവേഴ്‌സ് യൂണിയന്‍ തുടങ്ങി സംഘടനാ – ട്രേഡ് യൂണിയന്‍ രംഗങ്ങളിലും സജീവ സാന്നിദ്ധ്യമായിരുന്നു പി. ജി. എന്ന ചുരുക്കപ്പേരില്‍ അറിയപ്പെട്ടിരുന്ന സുരേഷ്‌കുമാര്‍.
ഭാര്യ: ലാലി (റിട്ടയേര്‍ഡ് റിസര്‍വ് ബാങ്ക് ഉദ്യോഗസ്ഥ). മകന്‍: നിതിന്‍ (ഐ. ടി. പ്രൊഫഷണല്‍). മരുമകള്‍: പ്രീതി. സഹോദരന്‍ പി.ജി. രാജഗോപാല്‍ (വാരപ്പെട്ടി), പി. ജി. ശ്രീലത (എറണാകുളം)
ഭൗതികശരീരം ഇന്ന് (25-8-2024, ഞായര്‍) ഉച്ചയ്ക്ക് ശേഷം 2:30 ഓടെ കടാതിയിലെ വീട്ടില്‍ കൊണ്ടുവരും. സംസ്കാരം നാളെ (26-8-2024, തിങ്കള്‍) രാവിലെ 11 മണിക്ക് വീട്ടുവളപ്പില്‍.
