ആലുവ: ആലുവയില്‍ രണ്ടിടങ്ങളില്‍ നിന്നായി അജ്ഞാത മൃതദേഹങ്ങള്‍ കണ്ടെത്തി. ആലുവ പുഴയില്‍ നിന്നാണ് ഒരു മൃതദേഹം കണ്ടെത്തിയത്. മറ്റൊന്ന് ആലുവ മെട്രോക്ക് സമീപത്ത് നിന്നുമാണ് കണ്ടെത്തിയത്.
ആലുവ മണപ്പുറം ഹരിത വനത്തിന്റെ കടവിനോട് ചേര്‍ന്ന് പുഴയില്‍ മുങ്ങി മരിച്ച നിലയിലാണ് 55 വയസ്സ് പ്രായം തോന്നിക്കുന്നയാളുടെ മൃതദേഹം കണ്ടെത്തിയത്. മാര്‍ക്കറ്റ് പാലത്തിന് താഴെ മെട്രോ തൂണ്‍ നമ്പര്‍ 26ന് എതിര്‍വശത്താണ് 40 വയസ്സ് പ്രായം തോന്നിക്കുന്നയാളെ മരിച്ച നിലയില്‍ കണ്ടെത്തിയത്. രണ്ട് മൃതദേഹങ്ങളും തിരിച്ചറിഞ്ഞിട്ടില്ല. ഇരുവരുടേയും മൃതദേഹങ്ങള്‍ ആലുവ ഗവണ്‍മെന്റ് ആശുപത്രി മോര്‍ച്ചറിയിലേക്ക് മാറ്റി. ഇവരെ കുറിച്ചുള്ള വിവരങ്ങള്‍ ലഭിക്കുന്നവര്‍ ആലുവ ഈസ്റ്റ് പൊലീസ് സ്റ്റേഷനുമായി ബന്ധപ്പെടണമെന്ന് അധികൃതര്‍ അറിയിച്ചു.
