മൂവാറ്റുപുഴ: ദമ്പതിമാരായ കുമാര്‍ കെ മുടവൂര്‍, സി എന്‍ കുഞ്ഞുമോള്‍ എന്നിവരുടെ കവിതാ സമാഹാരങ്ങളുടെ പ്രകാശനം 17 ന് വൈകിട്ട് നാലിന് മൂവാറ്റുപുഴ അര്‍ബന്‍ ബാങ്ക് ഓഡിറ്റോറിയത്തില്‍ നടക്കും. കുമാര്‍ കെ മുടവൂരിന്റെ ”കുറുമ്പനാന കുഞ്ഞാന”, സി എന്‍ കുഞ്ഞുമോളുടെ ”നിലാവിനെത്തൊടാന്‍ ” എന്നീ പുസ്തകങ്ങള്‍ കവി കുരീപ്പുഴ ശ്രീകുമാര്‍ പ്രകാശനം ചെയ്യും. പുരോഗമന കലാ സാഹിത്യ സംഘം ജില്ല സെക്രട്ടറി ജോഷി ഡോണ്‍ ബോസ്‌കോ, കവിയത്രി രവിത ഹരിദാസ് എന്നിവര്‍ പുസ്തകം ഏറ്റുവാങ്ങും. കവി ജിനീഷ് ലാല്‍ രാജ്, കവിയത്രി സിന്ധു ഉല്ലാസ് എന്നിവര്‍ പുസ്തകങ്ങള്‍ പരിചയപ്പെടുത്തും. പുരോഗമന കലാസാഹിത്യ സംഘം മൂവാറ്റുപുഴ ഏരിയ കമ്മിറ്റിയാണ് സംഘാടകര്‍.
പുരോഗമന കലാസാഹിത്യ സംഘം ജില്ല കമ്മിറ്റി അംഗമായ കുമാര്‍ കെ മുടവൂര്‍ നാടന്‍ പാട്ട് കലാകാരനുമാണ്. ഇരുവരുടേയും മകള്‍ എംബിബിഎസ് വിവിദ്യാര്‍ഥിനിയായ, നവമാധ്യങ്ങളില്‍ വെള്ളില എന്ന പേരില്‍ എഴുതുന്ന ശ്രീരഞ്ജിനിയാണ് ‘കുറുമ്പനാന കുഞ്ഞാന’യ്ക്ക് അവതാരിക എഴുതിയത്. മുന്‍ അധ്യാപികയും സംസ്ഥാന അധ്യാപക അവാര്‍ഡ് ജേതാവും പുരോഗമന കലാസാഹിത്യ സംഘം ജില്ല ജോയിന്റ് സെക്രട്ടറിയും ചിത്രകാരിയുമാണ് സി എന്‍ കുഞ്ഞുമോള്‍. ‘നിലാവിനെത്തൊടാന്‍’ പുസ്തകത്തിന് അവതാരിക എഴുതിയത് കവി സുമേഷ് കൃഷ്ണനാണ്. ഇരുവരുേടേയും രണ്ടാമത് കവിതാ സമാഹാരങ്ങളാണ് പ്രകാശനം നടത്തുന്നത്.
