കിഴക്കമ്പലത്തെ ആക്രമണത്തില്‍ പൊലീസ് വാഹനം തടഞ്ഞത് 50 പേരെന്ന് റിമാന്‍ഡ് റിപ്പോര്‍ട്ട്. സംഘര്‍ഷം തടയാനെത്തിയ പൊലീസ് ഉദ്യോഗസ്ഥരെ വധിക്കാന്‍ ശ്രമിച്ചെന്ന് റിമാന്‍ഡ് റിപ്പോര്‍ട്ടില്‍ പറയുന്നു. പൊലീസ് ഉദ്യോഗസ്ഥര്‍ പുറത്തിറങ്ങാന്‍ ശ്രമിച്ചപ്പോള്‍ തൊഴിലാളികള്‍ മര്‍ദിച്ചു. കല്ല്, മരവടി മാരകായുധങ്ങള്‍ എന്നിവ ഉപയോഗിച്ച് എസ്എച്ച്ഒയെ ആക്രമിച്ചുവെന്നും ശേഷം മറ്റു തൊഴിലാളികള്‍ കൂട്ടമായെത്തിയെന്നും റിമാന്‍ഡ് റിപ്പോര്‍ട്ടില്‍ പറയുന്നു.
അതിനിടെ കിഴക്കമ്പലത്തെ പൊലീസിനെതിരായ ആക്രമണത്തില്‍ 100 പേര്‍ കൂടി അറസ്റ്റില്‍. ഇതോടെ കേസില്‍ അറസ്റ്റിലായവരുടെ എണ്ണം 150 ആയി. അറസ്റ്റ് ചെയ്തവരില്‍ എട്ടു പേരാണ് ആക്രമണത്തിന് നേതൃത്വം നല്‍കിയത്. സംഭവവുമായി ബന്ധപ്പെട്ട് അന്വേഷണം പുരോഗമിക്കുകയാണെന്ന് പൊലീസ് വ്യക്തമാക്കി.
അതേസമയം സംഘര്‍ഷം ലേബര്‍ കമ്മിഷന്‍ അന്വേഷിക്കുമെന്ന് മന്ത്രി വി ശിവന്‍കുട്ടി അറിയിച്ചു. സ്ഥലത്തെ ക്രമസമാധാനം എങ്ങനെ നഷ്ടമായെന്ന് പരിശോധിക്കുമെന്നും തൊഴില്‍ നിയമങ്ങള്‍ ലംഘിക്കപ്പെട്ടോയെന്ന് പരിശോധിക്കുമെന്നും മന്ത്രി വ്യക്തമാക്കി.
കിഴക്കമ്പലത്തെ ആക്രമണത്തില്‍ തൊഴിലാളികള്‍ ഉപയോഗിച്ചത് മദ്യമല്ലെന്ന് സ്ഥിരീകരണം. ഇതര സംസ്ഥാന തൊഴിലാളികള്‍ ഉപയോഗിച്ചത് എംഡിഎംഎ ആണോയെന്ന സംശയത്തിലാണ് പൊലീസ്. ഇക്കാര്യത്തില്‍ വിശദമായ പരിശോധന നടത്തും.
അക്രമമുണ്ടായ ക്യാമ്പില്‍ അഞ്ഞൂറോളം തൊഴിലാളികള്‍ ഉണ്ട്. അന്തേവാസികളില്‍ മലയാളികളും ഉള്‍പ്പെടുന്നുവെന്നും പൊലീസ് പറഞ്ഞു.
