ഡോക്ടറെ മര്‍ദിച്ച പൊലീസുകാരന്റെ അറസ്റ്റ് വൈകില്ലെന്ന് ആലപ്പുഴ എസ്.പി. ജി. ജയദേവ്. പൊലീസുകാരന്റെ മുന്‍കൂര്‍ ജാമ്യാപേക്ഷയെ എതിര്‍ത്തിരുന്നുവെന്നും ജയദേവ് വ്യക്തമാക്കി.
മാവേലിക്കരയില്‍ ഡോക്ടറെ മര്‍ദിച്ച പൊലീസുകാരനെ അറസ്റ്റ് ചെയ്യാത്തതില്‍ പ്രതിഷേധിച്ച് ഡോക്ടര്‍മാര്‍ സംസ്ഥാന വ്യാപക സമരത്തിലാണ്്. കേരള ഗവണ്‍മെന്റ് മെഡിക്കല്‍ ഓഫീസേഴ്‌സ് അസോസിയേഷന്റെ നേതൃത്വത്തിലാണ് സമരം. രാവിലെ 10 മുതല്‍ 11 വരെ എല്ലാ സര്‍ക്കാര്‍ ആശുപത്രികളിലും ഒ.പി ബഹിഷ്‌കരിച്ചു.
ഇന്ന് മുഴുവന്‍ സ്‌പെഷാല്‍റ്റി ഒ.പികള്‍ ബഹിഷ്‌കരിക്കുകയും അടിയന്തരമല്ലാത്ത ശസ്ത്രക്രീയകള്‍ മാറ്റിവയ്ക്കുകയും ചെയ്യും. എന്നാല്‍ മറ്റ് ചികിത്സാ സംവിധാനങ്ങള്‍ക്ക് തടസമുണ്ടാകില്ല. ഐ.എം.എയും സമരത്തിന് പിന്തുണ പ്രഖ്യാപിച്ചിട്ടുണ്ട്.
പൊലീസുകാരനെ അറസ്റ്റ് ചെയ്യുന്നില്ലങ്കില്‍ വരും ദിവസങ്ങളില്‍ കൂടുതല്‍ ശക്തമായ സമരത്തിലേക്ക് പോകുമെന്നാണ് ഡോക്ടര്‍മാരുടെ മുന്നറിയിപ്പ്.
