ബാങ്ക് വായ്പയുടെ പേരില്‍ തട്ടിപ്പ് നടത്തിയ വ്യവസായി ശൈലേഷ് പാണ്ഡെയുടെ സഹോദരന്‍ അരവിന്ദ് പാണ്ഡെയുടെ വീട്ടില്‍ നിന്ന് 5.96 കോടി രൂപ കൊല്‍ക്കത്ത പൊലീസ് കണ്ടെടുത്തു. കേസില്‍ കൊല്‍ക്കത്ത പൊലീസ് നടത്തുന്ന രണ്ടാമത്തെ വീണ്ടെടുപ്പാണിത്. രണ്ട് ദിവസം മുമ്പ് ശൈലേഷ് പാണ്ഡെയുടെ വസതിയില്‍ നിന്ന് രണ്ട് കോടി രൂപ പൊലീസ് കണ്ടെടുത്തു. പിന്നാലെ 20 കോടി രൂപ നിക്ഷേപിച്ച രണ്ട് ബാങ്ക് അക്കൗണ്ടുകളും സീല്‍ ചെയ്തു.
കൊല്‍ക്കത്ത പൊലീസിന്റെയും ഹൗറ സിറ്റി പൊലീസിന്റെയും സംയുക്ത സംഘം ഞായറാഴ്ച രാത്രി ഹൗറ ജില്ലയിലെ അരവിന്ദ് പാണ്ഡെയുടെ വസതിയില്‍ റെയ്ഡ് നടത്തിയതായി ഒരു ഉദ്യോഗസ്ഥന്‍ പറഞ്ഞു. പുലര്‍ച്ചെ ഒരു മണിയോടെ ഉദ്യോഗസ്ഥര്‍ വീട്ടിലെത്തിയപ്പോള്‍ ആരും ഉണ്ടായിരുന്നില്ല. പൂട്ട് പൊളിച്ച് വീട്ടില്‍ കയറി പരിശോധന നടത്തി. പിന്നീട് ഒരു പെട്ടിയില്‍ നിന്ന് 5.96 കോടി രൂപ കണ്ടെടുത്തു. ഇതിനു പുറമെ സ്വര്‍ണാഭരണങ്ങള്‍, ലാപ്ടോപ്പ്, വാഹനം, ബാങ്ക് രേഖകളും പിടിച്ചെടുത്തു.
അരവിന്ദ് പാണ്ഡെ ഒളിവിലായതിനാല്‍ സിറ്റി പൊലീസ് ലുക്കൗട്ട് നോട്ടീസ് പുറപ്പെടുവിച്ചിട്ടുണ്ട്. രണ്ട് അക്കൗണ്ടുകളില്‍ നിന്നും വന്‍തുക ഇടപാടുകള്‍ നടന്നതായി ഒരു സ്വകാര്യ ബാങ്കിന്റെ ശാഖയിലെ ഉദ്യോഗസ്ഥര്‍ രേഖാമൂലം പരാതി നല്‍കിയതിനെ തുടര്‍ന്നാണ് പൊലീസ് അന്വേഷണം ആരംഭിച്ചത്.
