മോഹന്‍ലാല്‍ നായകനായ മരക്കാര്‍ സിനിമയുടെ തിയറ്റര്‍ റിലീസിനായി സര്‍ക്കാര്‍ ഇന്ന് ചര്‍ച്ച നടത്തും. കൊല്ലം ഗസ്റ്റ് ഹൗസിലാണ് ചര്‍ച്ച. മന്ത്രി സജി ചെറിയാനാണ് സിനിമാ സംഘടനകളും ആന്റണി പെരുമ്പാവൂരുമായി ചര്‍ച്ച നടത്തുക. ചര്‍ച്ചയില്‍ നിര്‍മാതാക്കളുടെ സംഘടനാ ഭാരവാഹികളും തീയറ്റര്‍ ഉടമകളും പങ്കെടുക്കും.
സിനിമ ഒ.ടി.ടിയില്‍ റിലീസ് ചെയ്യാനുള്ള നിര്‍മാതാവ് ആന്റണി പെരുമ്പാവൂരിന്റെ തീരുമാനത്തിനെതിരെ തീയറ്റര്‍ ഉടമകള്‍ രംഗത്തു വന്നിരുന്നു. പ്രശ്‌ന പരിഹാരത്തിന് സിനിമാ സംഘടനകള്‍ തമ്മില്‍ നടത്തിയ ചര്‍ച്ച പരാജയപ്പെട്ടതോടെയാണ് മന്ത്രിയുടെ ഇടപെടല്‍.
ഫിലിം ചേംബറിന്റെ മധ്യസ്ഥതയില്‍ തിയറ്റര്‍ ഉടമകളുടെ സംഘടനയായ ഫിയോക്കും നിര്‍മ്മാതാവ് ആന്റണി പെരുമ്പാവൂരും നടത്തിയ ചര്‍ച്ചയും തീരുമാനമാകാതെ പിരിഞ്ഞിരുന്നു. ആമസോണ്‍ പ്രൈമിലൂടെ ചിത്രം റിലീസ് ചെയ്യുമെന്നായിരുന്നു ഏറ്റവും ഒടുവില്‍ പുറത്തു വന്ന റിപ്പോര്‍ട്ട്.
