ആഷിക് അബുവിന്റെ വിമർശനങ്ങളോട് പ്രതികരിച്ച് സംവിധായകൻ സിബി മലയിൽ. ആഷിക് ആരോപിക്കുന്നത് മറുപടി അർഹിക്കാത്ത കാര്യങ്ങൾ ആണെന്നും അദ്ദേഹവുമായി തർക്കത്തിനോ വാക്ക് പോരിനോ ഇല്ലെന്നും അദ്ദേഹം പറഞ്ഞു. എല്ലാ യൂണിയനുകളിലും ഇങ്ങനെ കമ്മീഷൻ വാങ്ങുന്ന രീതിയുണ്ട്. പൂർണ മനസ്സോടെയല്ല കമ്മീഷൻ തന്നത് എന്നതിനാൽ പണം തിരിച്ചു നൽകി. ആഷിഖ് അബുവിനോട് വ്യക്തിപരമായി പ്രശ്നങ്ങൾ ഇല്ല. വിഷയത്തിൽ പരസ്യ തർക്കത്തിന് ഇല്ലെന്നും അദ്ദേഹം പറഞ്ഞു.
“ആഷിക് അബു കടുത്ത ഭാഷയിലാണ് തന്നോട് സംസാരിച്ചത്.വിഷയത്തിൽ പരസ്യ പോരിന് ഇല്ല. പറയേണ്ട കാര്യങ്ങൾ നേരത്തെ തന്നെ പറഞ്ഞിട്ടുണ്ട്.”- അദ്ദേഹം വ്യക്തമാക്കി.അതേസമയം, ആഷിഖ് അബു-റിമ കല്ലിങ്കൽ എന്നിവർക്കെതിരെ യുവമോർച്ച നൽകിയ പരാതിയിൽ പ്രാഥമികാന്വേഷണം നടത്താൻ സിറ്റി പൊലീസ് കമ്മിഷണർ നിർദേശം നൽകി. തെന്നിന്ത്യൻ ഗായിക സുചിത്ര സാമൂഹിക മാധ്യമത്തിലൂടെ നടത്തിയ ലഹരിമരുന്ന് ആരോപണത്തിൽ കേസെടുത്ത് അന്വേഷണം നടത്തണമെന്നാണ് യുവമോർച്ച ജില്ലാ പ്രസിഡന്റ്‌ വൈശാഖ് രവീന്ദ്രൻ നൽകിയ പരാതി. സൗത്ത് എസിപി രാജ്കുമാറാണ് അന്വേഷണം നടത്തുക. എന്നാൽ ആരോപണം തെറ്റാണെന്നും നിയമ നടപടി സ്വീകരിക്കുമെന്നും റിമ നേരത്തേ പറഞ്ഞിരുന്നു.
