സംസ്ഥാനത്ത് ഇന്ന് ബാങ്ക് ജീവനക്കാരുടെ പണിമുടക്ക്. തൃശൂര്‍ ആസ്ഥാനമായുള്ള സി.എസ്.ബി ബാങ്ക് ജീവനക്കാര്‍ക്ക് പിന്തുണ പ്രഖ്യാപിച്ചാണ് പണിമുടക്ക്. സഹകരണ, ഗ്രാമീണ ബാങ്ക് ജീവനക്കാരും പണിമുടക്കും. ബാങ്ക് ജീവനക്കാരുടെ സംയുക്ത സമര സമിതിയാണ് പണിമുടക്കിന് ആഹ്വാനം ചെയ്തിട്ടുള്ളത്.
കേരളത്തിലെ ബാങ്കിങ് മേഖല സ്തംഭിക്കാനാണ് സാധ്യത. കാനഡ ആസ്ഥാനമായ ഫെയര്‍ഫാക്‌സ് കമ്പനിക്ക് സി.എസ്.ബി ബാങ്ക് കൈമാറിയതോടെ തൊഴിലാളികളെ ദ്രോഹിക്കുകയാണെന്നാണ് ആക്ഷേപം.
റിസര്‍വ് ബാങ്ക് നിശ്ചയിച്ച വേതന ക്രമം നടപ്പാക്കുന്നില്ലെന്ന് സമരക്കാര്‍ ആരോപിച്ചു. കരാര്‍ അടിസ്ഥാനത്തിലാണ് നിയമനം. സി.എസ്.ബി ബാങ്ക് ജീവനക്കാര്‍ ദീര്‍ഘകാലമായി സമരത്തിലാണ്.
