മലയാളത്തിന്റെ മമ്മൂക്കക്ക് പിറന്നാള്‍ ആശംസകള്‍ നേര്‍ന്ന് അര്‍ദ്ധരാത്രിയില്‍ വീടിന് മുന്നിലെത്തിയത് നിരവധി പേരാണ്. മമ്മൂട്ടിയുടെ വസതിക്കു മുന്നില്‍ പ്രിയ താരത്തിനെ ഒരു നോക്ക് കണ്ട് ജന്മദിനാശംസ അറിയിക്കാന്‍ എത്തിയ ഫാന്‍സിനെ മമ്മൂട്ടിയും നിരാശരാക്കിയില്ല. ബാല്‍ക്കണിയിലെത്തിയ മമ്മൂട്ടി ആരാധകരുടെ ആശംസ ഏറ്റുവാങ്ങി അഭിവാദ്യം ചെയ്യുകയും ചെയ്തു. ഇതിന്റെ വീഡിയോ സോഷ്യല്‍ മീഡിയയില്‍ വൈറലാണ്.
വിവിധ പ്രദേശങ്ങളില്‍ നിന്നുമുള്ള മമ്മൂട്ടി ഫാന്‍സ് അംഗങ്ങള്‍ ഉള്‍പ്പടെയുള്ളവരാണ് 72-ന്റെ നിറവിലെത്തിയ മമ്മൂട്ടിയുടെ വീടിന് മുന്നില്‍ താരത്തിന് നേരിട്ട് ആശംസ അറിയിക്കാന്‍ തടിച്ച് കൂടിയത്. ഏറെ നേരത്തെ കാത്തിരിപ്പിനൊടുവിലാണ് താരമെത്തിയത്. ആരാധകരെ കാണാന്‍ മമ്മൂട്ടിയ്‌ക്കൊപ്പം ഇരട്ടി മധുരവുമായി ദുല്‍ഖറുമെത്തിയതോടെ ആഘോഷം കൂടുതല്‍ കളറായി.
നിരവധി പേരാണ് താരത്തിന് ജന്മദിനാശംസകളറിയിച്ച് സോഷ്യല്‍ മീഡിയയില്‍ പോസ്റ്റ് ചെയ്തിരിക്കുന്നത്. മുഖ്യമന്ത്രി പിണറായി വിജയനും താരത്തിന് ആശംസ അറിയിച്ചിട്ടുണ്ട്. പ്രായം ശരീരത്തെയും മനസിനെയും തളര്‍ത്താത്ത നടനാണ് മമ്മൂട്ടി. പ്രായത്തെ അഭിനയം കൊണ്ടും അര്‍പ്പണ ബോധം കൊണ്ടും പടിക്കു പുറത്തു നിര്‍ത്തിയിരിക്കുകയാണ് അദ്ദേഹമെന്ന് പറയാം.
