കാഞ്ഞങ്ങാട്: സംസ്ഥാന സ്‌കൂള്‍ കലോത്സവത്തിന് മുന്നോടിയായി 23ന് മാധ്യമ സെമിനാര്‍ നടത്താന്‍ മീഡിയ കോര്‍ കമ്മിറ്റി യോഗം തീരുമാനിച്ചു.’കലോത്സവം ഇന്നലെ ഇന്ന് നാളെ’ എന്ന വിഷയത്തില്‍ സെമിനാര്‍ ടൗണ്‍ ഹാളില്‍ രാവിലെ പത്തിന് രാജ്‌മോഹന്‍ ഉണ്ണിത്താന്‍ എംപി ഉദ്ഘാടനം ചെയ്യും. സെമിനാറില്‍ പ്രമുഖ മാധ്യമ പ്രവര്‍ത്തകന്‍ പി എം മനോജ് വിഷയം അവതരിപ്പിക്കും. രതീഷ് കാളിയാടന്‍ സംസാരിക്കും.24 ന് കാഞ്ഞങ്ങാട് ആകാശ് ഓഡിറ്റോറിയത്തില്‍ മെഗാഷോ നടത്താനും യോഗം തീരുമാനിച്ചു. ദൃശ്യവിസ്മയ കമ്മിറ്റി, കാഞ്ഞങ്ങാട് ആര്‍ട്ട് ഫോറം എന്നിയുമായി ചേര്‍ന്നാണ് മെഗാഷോ. മുന്‍ കലോത്സവ താരങ്ങളെ പങ്കെടുപ്പിച്ചുള്ള ഷോ മൂന്നര മണിക്കൂറിലേറെ നീളും. മീഡിയ പാസിനുള്ള അപേക്ഷ 15 നകം കാസര്‍കോട് പ്രസ് ക്ലബ്ബിലോ കാഞ്ഞങ്ങാട് പ്രസ് ഫോറത്തിലോ എത്തിക്കണം.
സ്റ്റാളിനുള്ള അപേക്ഷയും ഈ തീയതിക്കുള്ളില്‍ ലഭിക്കണം. ചെയര്‍മാന്‍ മുഹമ്മദ് ഹാഷിം അധ്യക്ഷനായി. നഗരസഭാ ചെയര്‍മാന്‍ വി വി രമേശന്‍, ജില്ലാ ഇന്‍ഫര്‍മേഷന്‍ ഓഫീസര്‍ എം മധുസൂദനന്‍, കണ്‍വീനര്‍ എന്‍ സദാശിവന്‍, ഇ വി ജയകൃഷ്ണന്‍, ടി കെ നാരായണന്‍ എന്നിവര്‍ സംസാരിച്ചു. സ്‌കൂള്‍ കലോത്സവം വിരുന്നെത്തുമ്പോള്‍ മേളയെ പകര്‍ത്താന്‍ മാധ്യമപ്രവര്‍ത്തകരുടെ പട കാഞ്ഞങ്ങാട്ടേക്ക്. കാസര്‍കോട് പ്രസ്‌ക്ലബ്ബ് പ്രസിഡണ്ട് മുഹമ്മദ് ഹാഷീം ചെയര്‍മാനും ഹയര്‍സെക്കന്‍ഡറി അധ്യാപകനായ എന്‍ സദാശിവന്‍ കണ്‍വീനറുമായ മീഡിയ കമ്മിറ്റിയാണ് ഇവരെ ഏകോപിപ്പിക്കുന്നത്. മുഖ്യവേദിയായ ഐങ്ങോത്ത് ആധുനിക സംവിധാനങ്ങളോടെ മീഡിയ സെന്റര്‍ ഒരുങ്ങും. 1500ല്‍ പരം പേര്‍ മാധ്യമപ്രതിനിധികളായി എത്തുമെന്നാണ് പ്രതീക്ഷ.
