മൂവാറ്റുപുഴ -ജീവനക്കാര്‍ക്ക് ഒക്ടോബര്‍ ,നവംബര്‍ മാസങ്ങളിലെ ശമ്പളം വിതരണം ചെയ്യാത്ത ബി.എസ്.എന്‍.എല്‍ മാനേജ്‌മെന്റിനെതിരെ ജീവനക്കാര്‍ മൂവാറ്റുപുഴ കസ്റ്റമര്‍ സര്‍വ്വീസ് സെന്ററിനു മുന്‍പില്‍ പ്രതിഷേധ കൂട്ടായ്മ നടത്തി. ബി.എസ്.എന്‍.എല്‍ മേഖലയില്‍ നടപ്പിലാക്കുന്ന വാളന്ററി റിട്ടയര്‍മെന്റ് സ്‌കീമിലേക്ക് കൂടുതല്‍ ജീവനക്കാരെ ചേര്‍ക്കാനാണ് ശമ്പളം മനപൂര്‍വ്വം താമസിപ്പിക്കുന്നതെന്ന് ബി.എസ്.എന്‍.എല്‍ എംപ്ലോയീസ് യൂണിയന്‍ ആരോപിച്ചു. ടെലികോം ഡിപ്പാര്‍ട്ടുമെന്റിനോ, അല്ലങ്കില്‍ കേന്ദ്ര സര്‍ക്കാരിനു തന്നെ ശമ്പള വിതരണത്തില്‍ ബി.എസ്.എന്‍.എല്‍ നെ സഹായിക്കാവുന്നതാണ്. ടെലികോം ഡിപ്പാര്‍ട്ടുമെന്റ് ബി.എസ്- എന്‍.എല്‍ ന് കൊടുക്കാനുള്ള പണം പോലും കൊടുക്കുന്നില്ല. ബി.എസ്.എന്‍.എല്‍ ന്റെ പുനരുദ്ധാരണ പാക്കേജില്‍ കേന്ദ്ര സര്‍ക്കാര്‍ പ്രഖ്യാപിച്ച 4G സ്‌പെക്ട്രവും സാമ്പത്തിക സഹായവും നടപ്പിലാക്കാന്‍ സര്‍ക്കാര്‍ തയ്യാറാവുന്നില്ല. ബി.എസ് എന്‍ എല്‍ സര്‍വ്വീസ് വ്യാപകമായി പുറംകരാറിന് കൊടുക്കാനാണ് സര്‍ക്കാര്‍ തീരുമാനിച്ചിരിക്കുന്നത്. സ്വകാര്യ ടെലികോം കമ്പനികള്‍46% ആണ് നിരക്ക് വര്‍ധിപ്പിച്ചത്.കഴിഞ്ഞ പന്ത്രണ്ട് വര്‍ഷത്തെ സ്‌പെക്ട്രം ചാര്‍ജും റവന്യൂ ഷെയറിങ്ങ് ഉള്‍പ്പെടെ സ്വകാര്യ ടെലികോം കമ്പനികള്‍ ഒരു ലക്ഷത്തി മുപ്പത്തിമൂവായിരം കോടി രൂപ കേന്ദ്ര സര്‍ക്കാരിന് കൊടുക്കാനുണ്ടന്ന് ബി.എസ്.എന്‍.എല്‍ എംപ്ലോയീസ് യൂണിയന്‍ സംസ്ഥാന അസി.സെക്രട്ടറി കെ.മോഹനന്‍ പറഞ്ഞു. ഈ സാമ്പത്തിക വര്‍ഷത്തിന്റെ ആദ്യത്തെ ആറു മാസത്തില്‍ വൊഡാഫോണ്‍ ഐഡിയ 50921 കോടി രൂപയുടെ നഷ്ടമാണ് രേഖപ്പെടുത്തിയത്.കേന്ദ്ര സര്‍ക്കാര്‍ സഹായിച്ചാല്‍ ബി.എസ്.എന്‍.എല്‍ ന് തീര്‍ച്ചയായും ലാഭത്തിലെത്താന്‍ കഴിയുമെന്ന് യൂണിയന്‍ അഭിപ്രായപ്പെട്ടു.മൂവാറ്റുപുഴ കസ്റ്റമര്‍ സര്‍വ്വീസ് സെന്ററിനു മുന്നില്‍ ചേര്‍ന്ന പ്രതിഷേധ പ്രകടനം കെ.മോഹനന്‍ ഉല്‍ഘാടനം ചെയ്തു.പി.കെ.രാജു, കെ.മുകുന്ദന്‍, വി.എം.പൗലോസ് എന്നിവര്‍ പ്രകടനത്തിന് നേതൃത്വം നല്‍കി
