കെഎസ്ആർടിസി ബസിനടിയിൽപ്പെട്ട സ്കൂട്ടർ യാത്രക്കാർക്ക് സാരമായി പരിക്കേറ്റു. പൊടിയാടി പെരിങ്ങര സ്വദേശികളായ സോമൻ, മോഹനൻ എന്നിവർക്കാണ് പരിക്കേറ്റത്. എടത്വ-തകഴി സംസ്ഥാന പാതയിൽ കേളമംഗലം-പറത്തറ പാലത്തിന് സമീപം ബുധനാഴ്ച രാവിലെ എട്ട് മണിയോടെയാണ് അപകടം.ഇടിയുടെ ആഘാതത്തിൽ സ്കൂട്ടർ യാത്രക്കാർ തെറിച്ച് റോഡിലേക്ക് വീണു. ബസിൽ ഇടിച്ച സ്കൂട്ടർ ഇരുന്നൂറ് മീറ്റർ മുന്നോട്ടുപോയി. നാട്ടുകാരും ഫയർഫോഴ്‌സും ചേർന്ന് ഇരുവരെയും വണ്ടാനം മെഡിക്കൽ കോളേജ് ആശുപത്രിയിൽ എത്തിച്ചു. മോഹനനെ അടിയന്തര ശസ്ത്രക്രിയയ്ക്ക് വിധേയനാക്കി. സോമൻ തീവ്രപരിചരണ വിഭാഗത്തിൽ ചികിത്സയിലാണ്.
എതിർദിശയിലെത്തിയ കെഎസ്ആർടിസി ബസ് നിയന്ത്രണം വിട്ട് സ്കൂട്ടർ യാത്രക്കാരെ ഇടിക്കുകയായിരുന്നുവെന്ന് സ്ഥലത്തുണ്ടായിരുന്ന നാട്ടുകാർ പറഞ്ഞു. കെഎസ്ആർടിസി ചേർത്തല ഡിപ്പോ ബസ് തിരുവല്ല ഭാഗത്തേക്ക് പോകുമ്പോഴാണ് അപകടമുണ്ടായത്.
