ഗോദയില്‍ ഇന്ത്യക്ക് വീണ്ടും മെഡല്‍. പുരുഷന്മാരുടെ 65 കിലോഗ്രാം ഗുസ്തിയില്‍ കസാക്കിസ്ഥാന്റെ ദൗലത് നിയാസ്‌ബെകോവിനെ 8-0 എന്ന സ്‌കോറിനു കീഴടക്കിയ ബജ്റംഗ് പുനിയ ആണ് ഇന്ത്യയുടെ മെഡല്‍ ശേഖരത്തിലേക്ക് ഒരു വെങ്കലം കൂടി കൂട്ടിച്ചേര്‍ത്തത്.
ആധികാരികമായായിരുന്നു ബജ്‌റംഗിന്റെ ജയം. ആദ്യ പിരിയഡില്‍ രണ്ട് പോയിന്റുകള്‍ക്ക് മുന്നിലെത്തിയ ഇന്ത്യന്‍ താരം ബ്രേക്കിനു ശേഷം കസാക്ക് സ്ഥാരത്തിന് ഒരു അവസരവും നല്‍കാതെയാണ് കളിച്ചത്. മൂന്ന് തവണ 2 പോയിന്റുകള്‍ നേടി ദൗലത്തിനെ നിഷ്പ്രഭനാക്കിയ ബജ്റംഗ് തന്ത്രപരമായാണ് കളിച്ചത്. മികച്ച കൗണ്ടര്‍ അറ്റാക്കുകളും പഴുതടച്ച പ്രതിരോധവുമാണ് ബജ്‌റംഗിന് ജയം നേടിക്കൊടുത്തത്.
മൂന്ന് തവണ ലോക ചാമ്പ്യനായിട്ടുള്ള അസര്‍ബെയ്ജാന്‍ തരാം ഹാജി അലിയേവിന് മുമ്പിലാണ് സെമിയില്‍ ബജ്രംഗ് കീഴടങ്ങിയത്. സ്‌കോര്‍ 12-5. ബജ്‌റംഗിന്റെ സ്ഥിര ദൗര്‍ബല്യമായ കാലുകള്‍ കൊണ്ടുള്ള പ്രതിരോധം മുതലെടുത്ത് അലിയേവ് ആദ്യ പീരിഡില്‍ തന്നെ 4-1 ന് മുന്നിലെത്തി. രണ്ടാം പീരിഡില്‍ അസര്‍ബെയ്ജാന്‍ തരാം 8-1 ന് മുന്നിലെത്തിയ ശേഷം ബജ്റംഗ് തിരിച്ചു വരവിന് ശ്രമിച്ചെങ്കിലും സമയം ഉണ്ടായിരുന്നില്ല. കിര്‍ഗിസ്ഥാന്റെ എര്‍നാസര്‍ അക്മതാലിയേവ്, ഇറാന്റെ മുര്‍ത്തസ ചേക്ക ഗിയാസി എന്നിവരെ തോല്‍പ്പിച്ചാണ് ഇന്ത്യന്‍ താരം സെമിയിലെത്തിയത്.
നേരത്തെ, ഒളിമ്പിക്സ് ഗോള്‍ഫില്‍ മെഡല്‍ പ്രതീക്ഷ ഉയര്‍ത്തിയ ഇന്ത്യന്‍ താരം അദിതി അശോകിന് മെഡല്‍ നഷ്ടമായി. താരം നാലാമതാണ് ഫിനിഷ് ചെയ്തത്.
ആദ്യ മൂന്ന് റൗണ്ടുകളിലും രണ്ടാമതായിരുന്ന അദിതി അവസാന ദിനമാണ് നിരാശപ്പെടുത്തിയത്. എങ്കിലും ഒളിമ്പിക്സ് വേദിയില്‍ എതിരാളികള്‍ക്ക് സമ്മര്‍ദം നല്‍കാന്‍ അദിതി അശോകിന് കഴിഞ്ഞു. ഗോള്‍ഫില്‍ ഒളിമ്പിക്സ് മെഡല്‍ നേടുന്ന ആദ്യ ഇന്ത്യന്‍ താരമെന്ന നേട്ടമാണ് ഇതോടെ അദിതിക്ക് നഷ്ടമായത്.
ലോക റാങ്കിംഗില്‍ 200ആം സ്ഥാനത്താണ് അദിതി. ടോക്യോയില്‍ ഒരു സാധ്യതയും കല്‍പിക്കപ്പെടാതിരുന്ന താരം. ആദ്യ മൂന്ന് റൗണ്ടുകളിലും രണ്ടാം സ്ഥാനത്ത് ഉറച്ചു നിന്ന അദിതിക്ക് അവസാന റൗണ്ടില്‍ കാലിടറി. റിയോ ഒളിമ്പിക്‌സില്‍ മത്സരിച്ച അദിതി 41ആം സ്ഥാനത്ത് ഫിനിഷ് ചെയ്തു. നാല് വര്‍ഷങ്ങള്‍ക്കിപ്പുറം അദിതി മടങ്ങുന്നത് നാലാം സ്ഥാനക്കാരിയായാണ്!
