തിരുവനന്തപുരത്ത് വീണ്ടും വന്‍ ലഹരി വേട്ട. 100 കിലോ കഞ്ചാവും മൂന്ന് കിലോ ഹാഷിഷ് ഓയിലുമാണ് സ്റ്റേറ്റ് എക്സൈസ് എന്‍ഫോഴ്‌സ്മെന്റ് സ്‌ക്വാഡ് ആറ്റിങ്ങലില്‍ നിന്നും പിടികൂടിയത്. അന്താരാഷ്ട്ര വിപണിയില്‍ 4 കോടി വിലമതിക്കുന്ന ലഹരിവസ്തുക്കളാണ് പിടിച്ചെടുത്തത്. ആറ്റിങ്ങല്‍ നഗരൂര്‍ പാതയില്‍ വെള്ളംകൊള്ളിയില്‍ വച്ചായിരുന്നു ലഹരിവസ്തുക്കളുമായെത്തിയ നാലംഗ സംഘത്തെ കസ്റ്റഡിയിലെടുത്തത്. ലഹരി കടത്തിക്കൊണ്ടു വന്ന എയ്‌സ്, ബൊലേറോ പിക്കപ്പ് വാഹനങ്ങളും പിടികൂടിയിട്ടുണ്ട്.
അറസ്റ്റിലായവരില്‍ റിയാസ്, ജസീം എന്നിവര്‍ നഗരൂര്‍ സ്വദേശികളാണ്. ഫൈസല്‍ തൃശൂര്‍ പാവറട്ടി സ്വദേശിയും നിയാസ് കോന്നി സ്വദേശിയുമാണ്. ആന്ധ്രയില്‍ നിന്നുമാണ് ഇവര്‍ കഞ്ചാവും ഹാഷിഷ് ഓയിലും വാങ്ങിയത്. റോഡ് മാര്‍ഗം കോയമ്പത്തൂരില്‍ എത്തിച്ചശേഷം അവിടെ നിന്നും കോഴികളെ കൊണ്ട് വരുന്നെന്ന വ്യാജേന ദേശിയ പാതയിലൂടെ ആറ്റിങ്ങലില്‍ എത്തിക്കുകയായിരുന്നു.
എക്സൈസ് വകുപ്പ് മന്ത്രിയുടെ പ്രത്യേക നിര്‍ദേശ പ്രകാരം രൂപീകരിച്ച സ്‌ക്വാഡ്ന്റെ ചുമതലയുള്ള എക്സൈസ് സര്‍ക്കിള്‍ ഇന്‍സ്പെക്ടര്‍ ടി അനികുമാറിന്റെ നേതൃത്വത്തില്‍ ഉള്ള സംഘമാമ് കഞ്ചാവ് പിടികൂടിയത്. എക്സൈസ് സര്‍ക്കിള്‍ ഇന്‍സ്പെക്ടര്‍ ജി കൃഷ്ണ കുമാര്‍, എക്സൈസ് ഇന്‍സ്പെക്ടര്‍മാരായ കെ വി വിനോദ്, ടി ആര്‍ മഹേഷ് കുമാര്‍, അസിസ്റ്റന്റ് എക്സൈസ് ഇന്‍സ്പെക്ടര്‍ എസ് മധുസൂദനന്‍ നായര്‍ പ്രിവന്റ്റീവ് ഓഫീസര്‍മാരായ ഹരികുമാര്‍, അനില്‍കുമാര്‍,സിവില്‍ എക്സൈസ് ഓഫീസര്‍മാരായ വിശാഖ്, രാജേഷ്, ഷംനാദ്, സുധീഷ്, ശ്രീലാല്‍, ജിതീഷ്, രതീഷ് മോഹന്‍, അഭിജിത്ത്, ഡ്രൈവര്‍ സുനില്‍കുമാര്‍ എന്നിവര്‍ ഉണ്ടായിരുന്നു
