ഇന്ത്യന്‍ പ്രീമിയര്‍ ലീഗ് പതിമൂന്നാം സീസണിലെ ഏഴാം മത്സരത്തില്‍ ചെന്നൈ സൂപ്പര്‍ കിംഗ്‌സിനെതിരെ ഡല്‍ഹി ക്യാപിറ്റല്‍സിനു ജയം. 44 റണ്‍സിനാണ് ഡല്‍ഹിയുടെ ജയം. 176 റണ്‍സ് വിജയലക്ഷ്യവുമായി ഇറങ്ങിയ ചെന്നൈക്ക് നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ 131 റണ്‍സെടുക്കാനേ സാധിച്ചുള്ളൂ. 43 റണ്‍സെടുത്ത ഫാഫ് ഡുപ്ലെസി ആണ് ചെന്നൈയുടെ ടോപ്പ് സ്‌കോറര്‍. ഡല്‍ഹിക്കായി കഗീസോ റബാഡ മൂന്നും ആന്റിച് നോര്‍ജെ രണ്ടും വിക്കറ്റുകള്‍ വീതം വീഴ്ത്തി. ജയത്തോടെ രണ്ട് മത്സരങ്ങളില്‍ രണ്ട് ജയവുമായി ഡല്‍ഹി പോയിന്റ് ടേബിളില്‍ ഒന്നാമതെത്തി.
അഞ്ചാം ഓവറില്‍ ഷെയിന്‍ വാട്‌സണ്‍ അക്‌സര്‍ പട്ടേലിന്റെ പന്തില്‍ ഹെട്മെയറിനു പിടി നല്‍കി മടങ്ങിയതോടെ ചെന്നൈക്ക് ആദ്യ വിക്കറ്റ് നഷ്ടം. ക്രീസില്‍ ഏറെ ബുദ്ധിമുട്ടിയ മുരളി വിജയ് (10) പവര്‍ പ്ലേയുടെ അവസാന പന്തില്‍ നോര്‍ജെയുടെ കൈകളില്‍ അവസാനിക്കുമ്പോള്‍ സ്‌കോബോര്‍ഡില്‍ വെറും 34 റണ്‍സ് മാത്രമായിരുന്നു ഉണ്ടായിരുന്നത്. ഋതുരാജ് ഗെയ്ക്വാദ് (5) റണ്ണൗട്ടായി.
നാലാം വിക്കറ്റില്‍ ഫാഫ് ഡുപ്ലെസിയും കേദാര്‍ ജാദവും ഒത്തുചേര്‍ന്നു. ഇരുവരും ചേര്‍ന്ന് 54 റണ്‍സിന്റെ മികച്ച കൂട്ടുകെട്ടുണ്ടാക്കി. 16ാം ഓവറില്‍ ആന്റിച് നോര്‍ജെയാണ് ഈ കൂട്ടുകെട്ട് പൊളിച്ചത്. നോര്‍ജെ ജാദവിനെ (26) വിക്കറ്റിനു മുന്നില്‍ കുരുക്കി. ഇതിനിടെ അവേഷ് ഖാന്റെ ഓവറുകളില്‍ ഹെട്മെയറും നോര്‍ജെയും ഓരോ തവണ വീതം ഡുപ്ലെസിയുടെ ക്യാച്ച് പാഴാക്കി. റബാഡയുടെ ഓവറില്‍ വീണ്ടും ഹെട്മെയര്‍ ഡുപ്ലെസിയെ കൈവിട്ടു. ആ ഓവറില്‍ തന്നെ ഡുപ്ലെസി ഋഷഭ് പന്തിന്റെ കൈകളില്‍ അവസാനിച്ചു. 43 റണ്‍സെടുത്തതിനു ശേഷമാണ് താരം പവലിയനിലേക്ക് മടങ്ങിയത്.
ഡെത്ത് ഓവറുകളില്‍ ഗംഭീരമായി പന്തെറിഞ്ഞ ഡല്‍ഹി ബൗളര്‍മാര്‍ ധോണിയ്ക്കും ജഡേജക്കും സ്‌കോര്‍ ചെയ്യാന്‍ അവസരം നല്‍കിയതേയില്ല. റബാഡ എറിഞ്ഞ അവസാന ഓവറില്‍ ഋഷഭ് പന്തിനു പിടിനല്‍കി ധോണിയും (15) മടങ്ങി. അവസാന പന്തില്‍ ജഡേജ (12) അമിത് മിശ്രയുടെ കൈകളില്‍ അവസാനിച്ചതോടെ ചെന്നൈയുടെ തകര്‍ച്ച പൂര്‍ണ്ണം.
