മൂവാറ്റുപുഴ: മൂവാറ്റുപുഴ ജനറല്‍ ആശുപത്രിയില്‍ പുതിയതായി നിര്‍മിക്കുന്ന ഒ.പി.അനക്‌സ് ബ്ലോക്കിന്റെ ശിലാസ്ഥാപനം ഈമാസം 18ന് രാവിലെ 10ന് എല്‍ദോ എബ്രഹാം എം.എല്‍.എ നിര്‍വ്വഹിക്കും. നഗരസഭ ചെയര്‍പേഴ്സണ്‍ ഉഷ ശശീധരന്‍ അധ്യക്ഷത വഹിക്കും. എം.എല്‍.എയുടെ ആസ്തി വികസന ഫണ്ടില്‍ നിന്നും അനുവദിച്ച 99.60-ലക്ഷം രൂപ മുതല്‍ മുടക്കിയാണ് ആശുപത്രി കവാടത്തിനോട് ചേര്‍ന്ന് പുതിയ ഒ.പി.അനക്‌സ് ബ്ലോക്ക് നിര്‍മ്മിക്കുന്നത്. പുതുതായി നിര്‍മിക്കുന്ന ഒ.പി.അനക്‌സ് ബ്ലോക്കില്‍ ആത്യാധുനീക സൗകര്യങ്ങളോട് കൂടിയ രജിസ്‌ട്രേഷന്‍ കൗണ്ടര്‍, രോഗികളെ പരിശോധിക്കുന്നതിനായി ഡോക്ടര്‍മാര്‍ക്ക് ഉപയോഗിക്കുന്നതിനായി ഒ.പി.മുറികള്‍, രോഗികള്‍ക്ക് ആരോഗ്യ ഇന്‍ഷ്യൂറന്‍സ് അടക്കമുള്ള ഇന്‍ഷ്യൂറന്‍സ് പേപ്പറുകള്‍ ശരിയാക്കുന്നതിനായി അത്യാതുനിക സൗകര്യങ്ങളോട് കൂടിയ ഇന്‍ഷ്യൂറന്‍സ് കൗണ്ടര്‍, ഇഞ്ചക്ഷന്‍, ഡ്രസ്സിംഗ്, പ്ലാസ്റ്റര്‍ അടക്കമുള്ള പ്രാഥമീക ചികിത്സ നല്‍കുന്നതിനുള്ള ആധുനീക രീതിയിലുള്ള നഴ്‌സിംഗ് റൂം, പോലീസ് എയ്ഡ്‌പോസ്റ്റ്, ക്യാന്റീന്‍ എന്നിവയാണ് പുതിയതായി നിര്‍മിക്കുന്ന ഒ.പി.അനക്‌സ് ബ്ലോക്കില്‍ സജ്ജീകരിച്ചിരിക്കുന്നത്.
