പാലക്കാട്: ആരുടെയെങ്കിലും കൈയ്യില്‍ സന്ദേശിന്റെ പ്രതീക്ഷയായ വീസയും പാസ്‌പോര്‍ട്ടും ലഭിച്ചിട്ടുണ്ടെങ്കില്‍ തിരിച്ചുനല്‍കണം. നിസ്സഹായനായ ചെറുപ്പക്കാരന്‍ അത്തരമൊരു വിളിക്കായി കാത്തിരിക്കുകയാണ്.
കഞ്ചിക്കോട്, കെഎന്‍ പുതൂര്‍ എസ്‌കെ വീട്ടില്‍ ജി.സന്ദേശ് ഏജന്‍സികള്‍ വഴിയാണു യൂറോപ്യന്‍ രാജ്യമായ ലാത്വിയയിലേക്കുള്ള വീസ സംഘടിപ്പിച്ചത്. യാത്രയ്ക്കു മണിക്കൂറുകള്‍ മാത്രം ശേഷിക്കെ നഷ്ടപ്പെട്ട വിഷമത്തിലാണ് ഈ ഇരുപത്തിയാറുകാരന്‍. ചൊവ്വാഴ്ച പുലര്‍ച്ചെ കോയമ്പത്തൂരില്‍ നിന്നുള്ള വിമാനത്തില്‍ ഡല്‍ഹിയിലേക്കും 27നു രാവിലെ ഡല്‍ഹിയില്‍ നിന്നു ലാത്വിയയിലേക്കുമായിരുന്നു യാത്ര നിശ്ചയിച്ചിരുന്നത്.
ഇതിനായി വീസ സ്റ്റാംപ് ചെയ്ത് വീട്ടിലേക്കു വരും വഴിയാണ് പാസ്‌പോര്‍ട്ട് സഹിതം നഷ്ടപ്പെട്ടത്. ബൈക്കില്‍ വരുന്ന വഴി പാലക്കാട് ബിഗ്ബസാറിനു സമീപത്തു വച്ച് നഷ്ടമായെന്നാണു സന്ദേശിനു സംശയം. സന്ദേശും സുഹൃത്തുക്കളും ചേര്‍ന്നു പലയിടത്തും പരിശോധിച്ചെങ്കിലും ഇവ കണ്ടെത്താനായില്ല. സൗത്ത് പൊലീസില്‍ പരാതി നല്‍കിയിട്ടുണ്ട്. ബിഎസ്സി കംപ്യൂട്ടര്‍ സയന്‍സ് പഠനം പൂര്‍ത്തിയാക്കിയ സന്ദേശ് നാട്ടിലെ ബാങ്കില്‍ താല്‍ക്കാലിക ജോലി ചെയ്യുകയാണ്.
ലാത്വിയയില്‍ എംബിഎ പഠനത്തിനൊപ്പം ജോലിയുമായിരുന്നു ലക്ഷ്യം. ദിവസവും 2 മണിക്കൂര്‍ മാത്രമാണ് അവിടെ എംബിഎ ക്ലാസുള്ളത്. ബാക്കി സമയം അവിടെ ഒരു ജോലി കണ്ടെത്തി കുടുംബത്തെ നോക്കാമെന്നാണ് സന്ദേശ് കരുതിയിരുന്നത്. അമ്മ ഷീലയ്ക്കും സഹോദരന്‍ സന്ദീപിനും ഈ യാത്രയില്‍ വലിയ പ്രതീക്ഷയുമായിരുന്നു. യാത്രയ്ക്കായി എല്ലാ ഒരുക്കങ്ങളും അമ്മ പൂര്‍ത്തിയാക്കി. നഷ്ട്ടപ്പെട്ട വീസ ലഭിച്ചില്ലെങ്കില്‍ 27ന് ഡല്‍ഹിയില്‍ നിന്നുള്ള യാത്ര സാധിക്കില്ല. അവസാന നിമിഷം വരെ വീസ കണ്ടെത്താനുള്ള പരിശ്രമത്തിലാണു കുടുംബം. 9020913388.
