മൂവാറ്റുപുഴ: സംസ്ഥാന സ്‌കൂള്‍ കലോത്സവത്തില്‍ ഹൈസ്‌കൂള്‍ വിഭാഗം നാടന്‍ പാട്ട് മത്സരത്തില്‍ എറണാകുളം ജില്ലയെ പ്രതിനിധീകരിച്ച എബനേസര്‍ ഹയര്‍ സെക്കന്ററി സ്‌കൂള്‍ വീട്ടൂരിന് എ ഗ്രേഡ് . മെഹറിന്‍ ഫര്‍സാന, അവന്തിക ജെ., ശ്രീലക്ഷ്മി പി. എസ്., വൈഗ സജിത്ത്, അനീന പൗലോസ്, ഗോഡ്‌സി മരിയന്‍ ബിജു, സിജിന്‍ എസ്. എന്നിവരായിരുന്നു ടീം അംഗങ്ങള്‍. ആലപ്പുഴ ജില്ലയിലെ വടക്കന്‍ മേഖലയില്‍ പുലയ സമുദായക്കാര്‍ക്കിടയില്‍ പ്രചാരത്തില്‍ ഉള്ളതും കൊടുങ്ങല്ലൂര്‍ അമ്മയെ വാഴ്ത്തി പാടുന്നതുമായ ഒരു ആചാര അനുഷ്ഠാന പാട്ടാണ് വടക്കുപുറത്ത് വിളക്കുവച്ചു പാട്ട്. അമ്മയുടെ അരശിരിക്കല്‍ ചടങ്ങി നോടനുബന്ധിച്ച് പാടുന്ന പാട്ടാണ് ഇത്. പരമ്പരാഗത നാട്ടുവാദ്യങ്ങള്‍ ആയ കിണ്ണം, തുടി, വലംതല, കൈ മണി എന്നിവയാണ് വടക്കുപുറത്തു പാട്ടിനായി ഉപയോഗിച്ചത്. കാഞ്ഞൂര്‍ നാട്ടുപൊലിമ നാടന്‍ പാട്ട് കലാസംഘത്തിലെ അഖില്‍ രാജും എബനേസര്‍ സ്‌കൂളിലെ സംഗീത അധ്യാപിക ജിഞ്ചുവും ചേര്‍ന്നാണ് കുട്ടികളെ പരിശീലിപ്പിച്ചത്.
