മൂവാറ്റുപുഴ: ഓണാഘോഷങ്ങളോടനുബന്ധിച്ച് വീട്ടൂര്‍ എബനേസര്‍ ഹയര്‍ സെക്കന്ററി സ്‌കൂളില്‍ പുലികളി സംഘടിപ്പിച്ചു. പൂക്കളമിട്ടും പായസം വിതരണം ചെയ്തും പുലികളി മേളത്തിനൊപ്പം ചുവടുവച്ചും കുട്ടികള്‍ ഇക്കൊല്ലത്തെ ഓണം അവിസ്മരണീയമാക്കി. ചായക്കൂട്ടും മുഖംമൂടിയുമണിഞ്ഞ പുലികളാണ് പൂരത്തിന്റെ തനത് താളത്തിനൊത്ത് ചുവടുവച്ചത്.
കവിയും, ഗാനരചയിതാവുമായ ജയകുമാര്‍ ചെങ്ങമനാട് ഓണാഘോഷ പരിപാടികള്‍ ഉദ്ഘാടനം ചെയ്തു. ഓണസന്ദേശവും പൂക്കള മത്സര വിജയികള്‍ക്കുള്ള സമ്മാന വിതരണവും അദ്ദേഹം നിര്‍വ്വഹിച്ചു. സ്‌കൂള്‍ മാനേജര്‍ കമാന്‍ഡര്‍ സി. കെ. ഷാജി മുഖ്യപ്രഭാഷണം നടത്തി. പി. ടി. എ. പ്രസിഡന്റ് മോഹന്‍ദാസ് എസ്. അധ്യക്ഷത വഹിച്ചു. പ്രിന്‍സിപ്പല്‍ ബിജുകുമാര്‍, ഹെഡ്മിസ്ട്രസ് ജീമോള്‍ കെ. ജോര്‍ജ്ജ്, അക്കാദമിക് കൗണ്‍സില്‍ അംഗം സുധീഷ് എം. എന്നിവര്‍ സംസാരിച്ചു.
