തൃശൂര്‍: നഴ്സിംഗ് പ്രവേശന തട്ടിപ്പുമായി ബന്ധപ്പെട്ട് യുവാവിനെ തട്ടിക്കൊണ്ടുപോയി മര്‍ദിച്ച സംഘം അറസ്റ്റില്‍.
തൃശൂര്‍ സ്വദേശി ജോഷി മാത്യുവിനെ തട്ടിക്കൊണ്ടുപോയ അഞ്ചംഗം സംഘമാണ് പിടിയിലായത്.
നഴ്സിംഗ് അഡ്മിഷന്‍റെ പേരില്‍ ജോഷിയുടെ സുഹൃത്ത് അഖില്‍ തട്ടിയെടുത്ത പണം തിരികെ ലഭിക്കുന്നതിനായിരുന്നു മര്‍ദനം. ജോഷിയാണ് അഖിലിനെ ഇവര്‍ക്ക് പരിചയപ്പെടുത്തിയത്. തുടര്‍ന്ന് ഇവര്‍ അഖിലിന് 18 ലക്ഷം രൂപ നല്‍കി.
എന്നാല്‍ പണം കൈപ്പറ്റിയ അഖില്‍ മുങ്ങിയതിനെ തുടര്‍ന്നാണ് ഇവര്‍ ജോഷിയെ തട്ടിക്കൊണ്ടുപോയത്. ചൊവ്വാഴ്ച പുലര്‍ച്ചെ പാലാരിവട്ടം പാലത്തിന് സമീപത്ത് നിന്നുമാണ് അഞ്ച് പേര്‍ ജോഷി മാത്യുവിനെ ബലമായി കാറില്‍ തട്ടിക്കൊണ്ടുപോയത്.
ജോഷിയുടെ അഞ്ച് പവന്‍റെ സ്വര്‍ണാഭരണവും 30,000 രൂപയും പ്രതികള്‍ കൈക്കലാക്കി പ്രതികള്‍ രക്ഷപ്പെട്ടു. ജോഷി ചികിത്സ തേടിയ ആശുപത്രിയിലെ അധികൃതര്‍ കൈമാറിയ വിവരത്തിന് അടിസ്ഥാനത്തിലാണ് പോലീസ് കേസ് രജിസ്റ്റര്‍ ചെയ്തത്. ജോഷിയുടെ വലതു കണ്ണിന് താഴെ എല്ലിന് പൊട്ടലുണ്ട്.
