ഇന്ത്യ-ഓസ്ട്രേലിയ മത്സരത്തില്‍ ഓസ്ട്രേലിയന്‍ ഇന്നിംഗ്സിന്റെ അവസാനത്തോടു എത്തിയ മഴ മാറാതെ തുടര്‍ന്നപ്പോള്‍ ടി20 മത്സരം ഉപേക്ഷിച്ചു. ഇതോടെ പരമ്പരയില്‍ ഒപ്പമെത്തുവാനുള്ള സുവര്‍ണ്ണാവസരമാണ് ഇന്ത്യയ്ക്ക് നഷ്ടമായത്. 19 ഓവറില്‍ 137 എന്ന പുനക്രമീകരിച്ച ലക്ഷ്യം ഇന്ത്യയ്ക്ക് നേടുവാനുള്ള സാധ്യത ഏറെയായിരുന്നു എന്നിരിക്കെ മത്സരം ഉപേക്ഷിക്കുവാനുള്ള തീരുമാനം ഇന്ത്യയ്ക്ക് തിരിച്ചടിയായി.
എന്നാല്‍ മഴ പെയ്തതിനാല്‍ വിക്കറ്റില്‍ നിന്ന് ഓസ്ട്രേലിയയ്ക്കും ഗുണം ലഭിച്ചേക്കുമെന്നതിനാല്‍ അവരെയും എഴുതി തള്ളുവാന്‍ സാധിക്കില്ല. ഇന്ത്യയ്ക്കെതിരെ ആദ്യം ബാറ്റ് ചെയ്യാന്‍ അയയ്ക്കപ്പെട്ട ഓസ്ട്രേലിയ 132/7 എന്ന സ്‌കോറാണ് 19 ഓവറില്‍ നിന്ന് നേടിയത്. 32 റണ്‍സ് നേടിയ ബെന്‍ മക്ഡര്‍മട്ട് ആണ് ഓസീസ് നിരയിലെ ടോപ് സ്‌കോറര്‍.
നഥാന്‍ കോട്ടര്‍നീല്‍ 20 റണ്‍സും ഗ്ലെന്‍ മാക്‌സ്വെല്‍ 19 റണ്‍സുമെടുത്ത് പുറത്തായി. ആന്‍ഡ്രൂ ടൈയും ബെന്നുമായിരുന്നു ക്രീസിലുണ്ടായിരുന്നത്. രണ്ട് വിക്കറ്റുകളാണ് ഖലീല്‍ നേടിയത്. ഭുവനേശ്വര്‍ കുമാറിനും രണ്ട് വിക്കറ്റുണ്ട്. കുല്‍ദീപ്, ബുംറ, ക്രുണാല്‍ എന്നിവര്‍ ഓരോ വിക്കറ്റുകള്‍ വീതം വീഴ്ത്തി.
