തിരുവനന്തപുരം: മലയാളി കായികതാരം പി യു ചിത്രയുടെ ചിത്രം പങ്കുവെച്ച് വിദ്യാഭ്യാസ മന്ത്രി വി ശിവന്‍കുട്ടി. ചിത്ര കേരളത്തിന്റെ അഭിമാനമാണെന്നും കുട്ടികള്‍ക്ക് പ്രചോദനമേകുന്ന മികച്ച കായിക താരങ്ങളില്‍ ഒരാളാണെന്നും മന്ത്രി തന്റെ ഫേസ്ബുക്ക് പേജില്‍ കുറിച്ചു.
ഗുസ്തി ഫെഡറേഷന്‍ ചെയര്‍മാന്‍ ബ്രിജ് ഭൂഷണിനെതിരായി ജന്തര്‍ മന്ദിറില്‍ ഗുസ്തി താരങ്ങള്‍ നടത്തുന്ന സമരത്തിനെതിരായ പി ടി ഉഷയുടെ പരാമര്‍ശത്തില്‍ വ്യാപക വിമര്‍ശനം ഉയരുന്ന വേളയിലാണ് മന്ത്രിയുടെ പോസ്റ്റ്. താരങ്ങളുടെ തെരുവിലെ സമരം ഇന്ത്യയുടെ പ്രതിച്ഛായയ്ക്ക് മങ്ങലുണ്ടാക്കിയെന്നായിരുന്നു പി ടി ഉഷയുടെ പരാമര്‍ശം.
പിടി ഉഷക്കെതിരെ വ്യാപക പ്രതിഷേധം
ഒളിംമ്പ്യന്‍ നീരജ് ചോപ്രയും പി ടി ഉഷയെ വിമര്‍ശിച്ചുകൊണ്ട് രംഗത്തെത്തിയിരുന്നു. പിടി ഉഷയില്‍ നിന്ന് ഇത് പ്രതീക്ഷിച്ചിരുന്നില്ലെന്ന് ഒളിമ്പിക് സ്വര്‍ണ മെഡല്‍ ജേതാവ് സാക്ഷി മാലികും പ്രതികരിച്ചിരുന്നു. ഇന്ത്യയ്ക്കായി പി യു ചിത്ര 2016 സൗത്ത് ഏഷ്യന്‍ ഗെയിംസ്, 2017 ഏഷ്യന്‍ ചാമ്പ്യന്‍ഷിപ്പ്, 2019 ദോഹ ഏഷ്യന്‍ അത്‌ലറ്റിക്‌സ് ചാമ്പ്യന്‍ഷിപ്പ് എന്നിവയില്‍ 1,500 മീറ്റര്‍ ഓട്ടത്തില്‍ സ്വര്‍ണം നേടിയിരുന്നു. 2018 ഏഷ്യന്‍ ഗെയിംസില്‍ വെങ്കല മെഡലും നേടിയിട്ടുണ്ട്.
