കൊച്ചി: ജഡ്ജിമാരില്‍ നിന്നും അനുകൂല വിധി വാങ്ങി നല്‍കാമെന്ന് പറഞ്ഞ്് കക്ഷികളില്‍ നിന്ന് അമിത പണം ഈടാക്കിയെന്ന പരാതിയില്‍ അഭിഭാഷകന്‍ സൈബി ജോസിന് കുരുക്കുമായി ഇഡിയും. 10 ലക്ഷം രൂപ കൈക്കൂലി വാങ്ങിയെന്ന സൈബിക്കെതിരെയുള്ള പരാതിയില്‍ ഇ.ഡിയും അന്വേഷണം നടത്തും. ഇതിനായി അന്വേഷണ സംഘത്തിന് കത്ത് നല്‍കും. ഇതിനിടെ എഫ്ഐആറില് തിരുത്തലിനായി അന്വേഷണ സംഘം അപേക്ഷ നല്‍കി.
പൊലീസ് ഇന്നലെ കൈക്കൂലി കേസില്‍ സൈബി ജോസ് കിടങ്ങൂരിനെതിരായ എഫ്‌ഐആര്‍ മൂവാറ്റുപുഴ വിജിലന്‍സ് കോടതിയില്‍ സമര്‍പ്പിച്ചിരുന്നു. ആലപ്പുഴ ക്രൈം ബ്രാഞ്ച് എസ്.പി കെ. എസ് സുദര്‍ശനന്റെ നേതൃത്വത്തിലുളള സംഘമാണ് കേസ് അന്വേഷിക്കുന്നത്. സൈബി എഫ്.ഐ.ആര്‍ രജിസ്റ്റര്‍ ചെയ്ത സാഹചര്യത്തില്‍ മുന്‍കൂര്‍ ജാമ്യാപേക്ഷയുമായി ഹൈക്കോടതിയെ സമീപിച്ചു.
ജഡ്ജിമാരില്‍ നിന്നും അനുകൂല വിധി വാങ്ങി നല്‍കാമെന്ന് പറഞ്ഞ് സൈബി ജോസ് കക്ഷികളില്‍ നിന്ന് അമിത പണം ഈടാക്കിയെന്ന് പൊലീസിന്റെ എഫ്ഐആറില് പറയുന്നു. 2020 ജൂലൈ മുതല്‍ കഴിഞ്ഞവര്‍ഷം ഏപ്രില്‍ വരെയുള്ള കാലയളവിലാണ് ഇത്. അഴിമതി നിരോധന നിയമപ്രകാരം കേസ് എടുത്തതിന് പിന്നാലെയാണ് പ്രത്യേക അന്വേഷണ സംഘത്തിനും രൂപം നല്‍കിയിരുന്നത്.
എഡിജിപി ദര്‍വേഷ് സാഹിബിന്റെ മേല്‍നോട്ടത്തില്‍ ക്രൈം ബ്രാഞ്ച് ആലപ്പുഴ യൂണിറ്റ് എസ്പി. കെ എസ് സുദര്‍ശനന്റെ നേതൃത്വത്തിലാണ് അന്വേഷണം. നേരത്തെ ഹൈക്കോടതി വിജിലന്‍സ്, കൊച്ചി സിറ്റി പൊലീസ് കമ്മീഷ്ണര്‍ എന്നിവര്‍ തയാറാക്കിയ റിപ്പോര്‍ട്ടുകള്‍ പഠിച്ച ശേഷമാവും മറ്റു നടപടികളിലേക്ക് അന്വേഷണ സംഘം കടക്കുക.ആദ്യ ഘട്ടത്തില്‍ കൈക്കൂലി നല്‍കി എന്ന് പറയപ്പെടുന്നവരുടെ മൊഴി അന്വേഷണ സംഘം രേഖപ്പെടുത്തും. അതിനു ശേഷമാകും സൈബി ജോസിന്റെ ചോദ്യം ചെയ്യുക. ആരോപണത്തില്‍ കഴമ്പുണ്ടെന്ന് തെളിഞ്ഞാല്‍ അറസ്റ്റുമുണ്ടാകും.
എഫ്ഐആറില് തിരുത്തലിനായി അപേക്ഷ നല്‍കി
അന്വേഷണ സംഘം എഫ്ഐആറില് തിരുത്തലിനായി അപേക്ഷ നല്‍കിയിട്ടുണ്ട്. ‘ജഡ്ജിമാര്‍ക്ക് കൈക്കൂലി കൊടുക്കണമെന്നോ ഉള്ള ഉദ്ദേശത്തോടെ’ എന്ന വാചകം കൂട്ടി ചേര്‍ക്കാനാണ് അപേക്ഷ. പ്രതിക്ക് ചതിചെയ്ത് അന്യായ ലാഭം ഉണ്ടാക്കണമെന്ന് ഉദ്ദേശത്തോടെയും കരുതലോടെയും കൂടി’ എന്നായിരുന്നു ആദ്യ വാചകം. ഇതിനൊപ്പമാണ് ജഡ്ജിമാരെ കുറിച്ചുള്ള വാചകം കൂടി ചേര്‍ക്കാന്‍ അന്വേഷണ സംഘത്തിന്റെ നീക്കം.
