ബാറ്റ് കൊണ്ട് ആറാടിയിട്ടും ആസ്ത്രേലിയക്കെതിരെ ട്വന്റി20 ജയിക്കാന്‍ ഇന്ത്യക്കായില്ല. ഇന്ത്യ ഉയര്‍ത്തിയ 208 റണ്‍സ് നാല് ബോള്‍ ബാക്കിവെച്ചാണ് ആസ്ത്രേലിയ മറികടന്നത്. കാമറോണ്‍ ഗ്രീനിന്റെയും മാത്യൂ വേഡിന്റെയും തകര്‍പ്പനടിയില്‍ മത്സരം ഇന്ത്യയില്‍ നിന്ന് കങ്കാരുപ്പട പിടിച്ചു വാങ്ങുകയായിരുന്നു.
ഇന്ത്യ ഉയര്‍ത്തിയ സ്‌കോര്‍ അനായേസേന മറികടക്കാം എന്ന ആത്മവിശ്വാസത്തില്‍ തന്നെയാണ് ആസ്ത്രേലിയ മറുപടി ബാറ്റിങ്ങ് ആരംഭിച്ചത്. ടീം 39 റണ്‍സില്‍ നില്‍ക്കെ ആരോണ്‍ ഫിഞ്ച് 22 ന് പുറത്തായെങ്കിലും കാമറോണ്‍ ഗ്രീനും സ്റ്റീവന്‍ സ്മിത്തും ചേര്‍ന്ന് സ്‌കോര്‍ വേഗത്തില്‍ ഉയര്‍ത്തി. മികച്ച ഫോമില്‍ നില്‍ക്കെ കോഹ്ലിക്ക് ക്യാച്ച് നല്‍കി ഗ്രീന്‍ പുറത്ത്. 30 ബൗളില്‍ എട്ട് ഫോറും നാല് സിക്സറുമടിച്ച് 61 റണ്‍സാണ് ഗ്രീന്‍ ടീമിന് സംഭാവന ചെയ്തത്. 35ല്‍ നില്‍ക്കെ സ്മിത്തും പുറത്തായി.
പ്രതീക്ഷയോടെ എത്തിയ മാക്സ് വെല്‍ 1 റണ്‍സിന് കൂടാരം കയറി. പതുക്കെ റണ്‍ ഉയര്‍ത്തിയ ജോഷ് ഇന്‍ഗ്ളിസും17 റണ്‍സിന് പുറത്തായതോടെ കളി കൈവിട്ടെന്ന് ഓസ്ട്രേലിയന്‍ ആരാധകര്‍ ഉറപ്പിച്ചു. അവിടെ ടിം ഡേവിഡും മാത്യൂ വെയ്ഡും കളി ഏറ്റെടുത്തു. ഇരുവരും ഇന്ത്യന്‍ ബൗളര്‍മാരെ തലങ്ങും വിലങ്ങും പ്രഹരിച്ചു. ടീമിനെ വിജയത്തിലെത്തിച്ചേ ഇരുവരും ക്രീസ് വിടൂ എന്ന് ഉറപ്പിച്ചെങ്കിലും അവസാന ഓവറില്‍ 18 റണ്‍സില്‍ ഡേവിഡ് പുറത്തായി. പാറ്റ് കമ്മിന്‍സ് എത്തി ജയമുറപ്പിച്ച് മടങ്ങി. ഇന്ത്യക്കായി നാല് ഓവറില്‍ 17 റണ്‍സ് വിട്ട്കൊടുത്ത് മൂന്ന് വിക്കറ്റ് അക്സര്‍ വീഴ്ത്തിയപ്പോള്‍ ഉമേഷ് യാദവ് രണ്ട് വിക്കറ്റും നേടി.
ടോസ് നേടി ബൗളിങ് തെരഞ്ഞെടുത്ത ആസ്ത്രേലിയയെ കണക്കിന് പ്രഹരിച്ചാണ് ആദ്യം ബാറ്റ് ചെയ്ത ഇന്ത്യ ക്രീസ് വിട്ടത്. നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 208 റണ്‍സാണ് ഇന്ത്യ ആസ്ത്രേലിയക്ക് മുന്നില്‍ വെച്ചത്. 71 റണ്‍സ് നേടിയ ഹര്‍ദിക്കിന്റെ വെടിക്കെട്ട് ബാറ്റിങ്ങിലാണ് ഇന്ത്യ മികച്ച സ്‌കോര്‍ കണ്ടെത്തിയത്. 30 ബോളില്‍ ഏഴ് ഫോറും അഞ്ച് സിക്സറിന്റെയും അകമ്പടിയിലാണ് ഹര്‍ദിക് 71 റണ്‍സ് നേടിയത്.
ടീം 21 റണ്‍സില്‍ നില്‍ക്കുമ്പോള്‍ 11 റണ്‍സില്‍ ക്യാപ്റ്റന്‍ രോഹിത് ശര്‍മ കൂടാരം കയറി. ഹസല്‍വുഡാണ് രോഹിത്തിനെ വീഴ്ത്തിയത്. ഏഷ്യകപ്പിലെ അവസാന മത്സരത്തില്‍ മിന്നും പ്രകടനം കാഴ്ചവെച്ച വിരാട് കോഹ്ലി പ്രതീക്ഷകള്‍ മുഴുവന്‍ തെറ്റിച്ച് ഏഴ് ബൗള്‍ നേരിട്ട് രണ്ട് റണ്‍സിന് പുറത്തായി.
പിന്നാലെ എത്തിയ സൂര്യകുമാര്‍ യാദവും കെ.എല്‍ രാഹുലും ചേര്‍ന്ന് ടീമിന്റെ സ്‌കോര്‍ അതിവേഗത്തില്‍ ഉയര്‍ത്തി. പക്ഷേ ടീം 103 ല്‍ നില്‍ക്കെ രാഹുല്‍ (55) പുറത്തായി. ഗ്രീന്‍, സൂര്യകുമാറിനെയും (46) കൂടാരം കയറ്റി. അവസാന ഓവറുകളിലെ ഹര്‍ദിക്ക് മാജിക് ആവര്‍ത്തിച്ചതോടെ ഇന്ത്യയുടെ സ്‌കോര്‍ 208ല്‍ എത്തി.
ഓസ്ട്രേലിയക്ക് വേണ്ടി നഥാന്‍ എല്ലിസ് മൂന്ന് വിക്കറ്റ് നേടിയപ്പോള്‍ ഹസ്ലെവുഡ് രണ്ട് വിക്കറ്റും ഗ്രീന്‍ ഒരുവിക്കറ്റും വീഴ്ത്തി.
