പത്തനംതിട്ട ഓമല്ലൂരില്‍ പേ ലക്ഷണങ്ങളോടെയുള്ള വീട്ടുവളപ്പില്‍ കയറിയ നായയെ സാഹസികമായി പിടികൂടി. ഫയര്‍ഫോഴ്സ് സംഘവും ‘ആരോ’ ഡോഗ് ക്യാച്ചേഴ്സും ചേര്‍ന്നാണ് നായയെ പിടികൂടിയത്. ബട്ടര്‍ഫ്ളൈ നെറ്റ് ഉപയോഗിച്ചാണ് നായയെ പിടികൂടിയത്. പേ വിഷ ലക്ഷണങ്ങളുള്ളതിനാല്‍ മയക്കുമരുന്ന് കുത്തിവെക്കാനുള്ള ശ്രമമാണ് നടക്കുന്നത്.
രാവിലെ ഏഴേ മുക്കാലോടെയാണ് നായ വീട്ടുവളപ്പിലെത്തിയത്. ഈ സമയം വീട്ടില്‍ രണ്ടു സ്ത്രീകളാണുണ്ടായിരുന്നത്. ആദ്യം ഇരുവര്‍ക്കും അസ്വാഭാവികത തോന്നിയിരുന്നില്ല. പിന്നീട് വായില്‍ നുര വരുന്നത് കണ്ടാണ് സംശയം തോന്നിയത്. പിന്നീട് വീടിന്റെ ജനലും വാതിലുകളും അടച്ച് പഞ്ചായത്ത് പ്രസിഡന്റിനെ വിവരം അറിയിക്കുകയായിരുന്നു. പിന്നീട് ഒമ്പതോടെ ഉദ്യോഗസ്ഥരെത്തുകയും 11.30 ഓടെ നായയെ പിടികൂടുകയുമായിരുന്നു. ഇപ്പോള്‍ നായ നിരീക്ഷണത്തിലാണ്.
അതിനിടെ, പാലക്കാട് മേലാമുറിയില്‍ പേ വിഷബാധയേറ്റ പശു ചത്തു. മേലാമുറി സ്വദേശി ജെമിനി കണ്ണന്റെ പശുവാണ് ചത്തത്. കഴിഞ്ഞ ദിവസമാണ് പേ വിഷബാധയേറ്റ ലക്ഷണങ്ങള്‍ പശു കാട്ടിയത്.
അതേസമയം, സംസ്ഥാനത്ത് തെരുവുനായ ശല്യം നിയന്ത്രിക്കാനുള്ള തീവ്ര വാക്സിനേഷന്‍ ഡ്രൈവിന് ഇന്ന് ഔദ്യോഗിക തുടക്കം. ഒരു മാസത്തെ ക്യാമ്പയിനില്‍ സംസ്ഥാനത്തെ മുഴുവന്‍ തെരുവുനായകള്‍ക്കും വാക്സിന്‍ നല്‍കാനാണ് സര്‍ക്കാര്‍ ലക്ഷ്യം. മൂന്ന് ലക്ഷത്തിലേറെ തെരുവുനായകള്‍ ഉണ്ടെന്നാണ് മൃഗസംരക്ഷണ വകുപ്പിന്റെ കണക്ക്. തദ്ദേശ വകുപ്പിന്റെ നേതൃത്വത്തില്‍ സന്നദ്ധ സംഘടനകളുടെയടക്കം സഹായത്തോടെയാണ് ക്യാമ്പ് നടക്കുക. പല തദ്ദേശ സ്ഥാപനങ്ങളും നേരത്തെ തന്നെ തെരുവുനായകള്‍ക്കുള്ള വാക്സിനേഷന്‍ ആരംഭിച്ചിട്ടുണ്ട്.
