അഗ്‌നിപഥ് പദ്ധതിക്കെതിരെ പ്രക്ഷോഭം കനക്കുന്നതിനിടെ പ്രധാനമന്ത്രി നരേന്ദ്ര മോദി ഇന്ന് മൂന്ന് സേനാ മേധാവികളുമായി ചര്‍ച്ച നടത്തും. പ്രതിഷേധങ്ങള്‍ വകവെക്കാതെ പദ്ധതിയുമായി മുന്നോട്ടു പോകാനാണ് സര്‍ക്കാര്‍ തീരുമാനം. ചില തീരുമാനങ്ങള്‍ തുടക്കത്തില്‍ അന്യായമെന്ന് തോന്നുമെങ്കിലും അത് ഭാവിയില്‍ രാഷ്ട്രനിര്‍മാണത്തിന് സഹായകരമാണെന്ന് മനസ്സിലാവുമെന്ന് കഴിഞ്ഞ ദിവസം പ്രധാനമന്ത്രി പറഞ്ഞിരുന്നു.
അഗ്‌നിപഥ് പദ്ധതിക്കെതിരെ രാജ്യത്ത് നടന്ന പ്രക്ഷോഭത്തില്‍ വന്‍ അക്രമങ്ങളാണ് നടന്നത്. ട്രെയിനുകള്‍ കത്തിച്ചത് അടക്കം റെയില്‍വേക്ക് ലക്ഷക്കണക്കിന് രൂപയുടെ നഷ്ടമുണ്ടായി. കഴിഞ്ഞ ദിവസം പ്രതിഷേധക്കാര്‍ ഭാരത് ബന്ദിന് ആഹ്വാനം ചെയ്തതിനെ തുടര്‍ന്ന് 600 ട്രെയിനുകള്‍ റദ്ദാക്കിയിരുന്നു.
അഗ്‌നിപഥ് പദ്ധതി പ്രകാരം സേനകളിലേക്ക് ആളുകളെ റിക്രൂട്ട് ചെയ്യുന്നതിനുള്ള ഷെഡ്യൂള്‍ മൂന്ന് സേനാവിഭാഗങ്ങളും കഴിഞ്ഞ ദിവസം പ്രഖ്യാപിച്ചിരുന്നു. അതേസമയം ഏതെങ്കിലും കേസുകളുടെ എഫ്ഐആറില്‍ പേരുള്ളവര്‍ക്ക് അഗ്‌നിപഥ് പദ്ധതി വഴി ജോലി ലഭിക്കില്ലെന്നും സേനാ മേധാവികള്‍ വ്യക്തമാക്കിയിരുന്നു.
