മെസേജിംഗ് പ്ലാറ്റ്‌ഫോമായ ടെലിഗ്രാം സ്‌പോണ്‍സേര്‍ഡ് മെസേജ് അവതരിപ്പിക്കാന്‍ ഒരുങ്ങുന്നതായി റിപ്പോര്‍ട്ട്. നിലവില്‍ ഇതിന്റെ ടെസ്റ്റുകള്‍ നടന്ന് കൊണ്ടിരിക്കുകയാണ്. വ്യക്തിഗത ഉപയോക്തൃ ഡാറ്റ ഉപയോഗിക്കുന്ന വാട്‌സാപ്പിലെ മെസേജുകളില്‍ നിന്ന് വ്യത്യസ്തമായിരിക്കും ഇതെന്ന് ടെലിഗ്രാം സിഇഒ പവല്‍ ദുറോവ് തന്റെ ചാനലില്‍ കുറിച്ചു. കൂടാതെ, ടെലിഗ്രാമിലെ സ്‌പോണ്‍സേര്‍ഡ് മെസേജുകള്‍ 1000-ലധികം സബ്സ്‌ക്രൈബര്‍മാരുള്ള ചാനലുകളിലെ ഉപയോക്താക്കള്‍ക്ക് മാത്രമേ ദൃശ്യമാകൂ.
മറ്റ് ആപ്പുകളെപ്പോലെ ടെലിഗ്രാം പരസ്യങ്ങള്‍ പ്രദര്‍ശിപ്പിക്കുന്നതിന് സ്വകാര്യ ഡാറ്റ ഉപയോഗിക്കുന്നില്ലെന്ന് അദ്ദേഹം പറഞ്ഞു. ഉപയോക്താക്കള്‍ വാട്ട്സ്ആപ്പില്‍ ഉള്ളതിനേക്കാള്‍ ടെലിഗ്രാമില്‍ കൂടുതല്‍ ”പരസ്യ രഹിതം” ആയിരിക്കുമെന്ന് അദ്ദേഹം പറഞ്ഞു.
സ്‌പോണ്‍സേര്‍ഡ് പരസ്യങ്ങളുടെ ലോഞ്ച് നടന്ന് കഴിഞ്ഞാല്‍, ടെലിഗ്രാമിന്റെ അടിസ്ഥാന ചെലവുകള്‍ക്കുള്ള തുക കണ്ടെത്തിയതിന് ശേഷം സ്‌പോണ്‍സേര്‍ഡ് മെസേജുകള്‍ പ്രദര്‍ശിപ്പിക്കുന്ന ചാനലുകളുടെ അഡ്മിനുമായി പ്ലാറ്റ്ഫോം പരസ്യ വരുമാനം പങ്കിടുമെന്ന് ദുറോവ് കുറിച്ചു. സന്ദേശമയയ്ക്കല്‍ അപ്ലിക്കേഷനിലെ പരസ്യങ്ങള്‍ അപ്രാപ്തമാക്കാന്‍ ഉപയോക്താക്കളെ അനുവദിക്കുന്ന ഒരു സബ്സ്‌ക്രിപ്ഷന്‍ മോഡലില്‍ ടെലിഗ്രാം പ്രവര്‍ത്തിക്കുന്നുണ്ടെന്ന് ഈ മാസം ആദ്യം ദുറോവ് പ്രഖ്യാപിച്ചിരുന്നു. ഇതിന്റെ നിരക്ക് വെളിപ്പെടുത്തിയിട്ടില്ല.
