വെസ്റ്റ് ഇന്‍ഡീസ് ജഴ്സിയോട് വിട പറഞ്ഞ് ക്രിസ് ഗെയ്ല്‍. അവസാന മത്സരത്തില്‍ ക്രിസ് ഗെയ്ല്‍ 15 റണ്‍സിന് പുറത്ത്. ഓസ്ട്രേലിയയ്ക്കെതിരെ നടന്ന മത്സരത്തില്‍ 9 പന്തുകള്‍ നേരിട്ട ഗെയ്ല്‍ 2 പന്തുകളെ അതിര്‍ത്തി കടത്തിയ ശേഷമാണ് മടങ്ങിയത്.
പുറത്താകലിന്റെ നിരാശ പ്രകടിപ്പിച്ചെങ്കിലും ഡ്രസിംഗ് റൂമിലേയ്ക്കുള്ള മടങ്ങിപ്പോക്കില്‍ അദ്ദേഹം ബാറ്റ് ഉയര്‍ത്തി കാണികളെ അഭിവാദ്യം ചെയ്തു. കാണികളും സഹതാരങ്ങളും എഴുന്നേറ്റ് നിന്ന് കയ്യടിച്ചാണ് ഗെയ്ലിനോടുള്ള ആദരവും സ്നേഹവും പ്രകടിപ്പിച്ചത്.
ഗെയ്ലിനൊപ്പം ഡ്വെയ്ന്‍ ബ്രാവോയും വിരമിക്കല്‍ പ്രഖ്യാപിച്ചിരുന്നു. ഇതോടെ വെസ്റ്റ് ഇന്‍ഡീസ് ക്രിക്കറ്റിനെ ഇന്നത്തെ നിലയില്‍ എത്തിച്ച രണ്ട് ഇതിഹാസ താരങ്ങളാണ് ഓസീസിനെതിരായ മത്സരത്തോടെ വിടപറയുന്നത്.
രണ്ട് തവണ ലോകകപ്പ് ഉയര്‍ത്തിയ വിന്‍ഡീസ് ടീമിലെ അംഗമായ ക്രിസ് ഗെയ്ല്‍ ട്വന്റി20യില്‍ 79 മത്സരങ്ങളിലാണ് ജഴ്സിയണിഞ്ഞത്. 28.11 ശരാശരിയില്‍ 1899 റണ്‍സാണ് ഗെയ്ലിന്റെ സമ്പാദ്യം. 2 സെഞ്ച്വറികളും 14 അര്‍ധ സെഞ്ച്വറികളും 19 വിക്കറ്റുകളും ഗെയ്ല്‍ സ്വന്തമാക്കിയിട്ടുണ്ട്.
ട്വന്റി20 ക്രിക്കറ്റിലെ ഏറ്റവും മികച്ച ബാറ്റ്സ്മാന്‍മാരില്‍ ഒരാളായി വിലയിരുത്തപ്പെടുന്ന ഗെയ്ല്‍ 452 മത്സരങ്ങളില്‍ നിന്നും 14,306 റണ്‍സാണ് അടിച്ചു കൂട്ടിയത്. ട്വന്റി20യില്‍ 12,000 റണ്‍സ് പിന്നിട്ട ഒരേയൊരു ബാറ്റ്സ്മാനും ഗെയ്ല്‍ ആണ്.
2014ന് ശേഷം വെസ്റ്റ് ഇന്‍ഡീസിന് വേണ്ടി ഒരു ടെസ്റ്റ് മത്സരം പോലും ക്രിസ് ഗെയ്ല്‍ കളിച്ചിട്ടില്ല. 103 ടെസ്റ്റ് മത്സരങ്ങളില്‍ നിന്നും 7214 റണ്‍സും 301 ഏകദിന മത്സരങ്ങളില്‍ നിന്നും 10,480 റണ്‍സും ഗെയ്ല്‍ സ്വന്തം പേരില്‍ കുറിച്ചിട്ടുണ്ട്.
1999 ഓഗസ്റ്റ് 14ന് ഇന്ത്യയ്ക്കെതിരെ നടന്ന ഏകദിന മത്സരത്തിലൂടെയാണ് ഗെയ്ല്‍ വെസ്റ്റ് ഇന്‍ഡീസ് ടീമില്‍ അരങ്ങേറ്റം കുറിച്ചത്. തുടര്‍ന്ന് തൊട്ടടുത്ത വര്‍ഷം ടെസ്റ്റ് ടീമിലും 2006ല്‍ ട്വന്റി20 ടീമിലും ഗെയ്ല്‍ അരങ്ങേറ്റം കുറിച്ചു.
